Shillong, Risaw 10
U Symbud Myntri Rangbah ka Jylla bad Chairman ka Regional Committee jong ka West Jaiñtia Hills, Bah Sniawbhalang Dhar, ha ka Sngi Thohdieng u la ong ba ka jinglong-jingman ha Lapangap ka la don hapdeng ka jingjai-jai bad la khmih lynti ba ka jinglong-jingman kan sa wanphai biang kumba ju long ha kine ki khyndiat sngi ban wan.
Kane ka jingpyntikna ka wan shisngi hadien ba la mih ka jingïakynad hapdeng ki nongshong shnong Karbi bad Pnar ha shi lynter khappud jong ka Assam bad Meghalaya, kaba la ïalam sha ka jingïap jong uwei u briew.
Katkum ka jingong u Bah Dhar, katei ka jingjia ka la jia namar ka jingot kba da ki trai shnong, ka bym pat ju jia mynno-mynno ruh, bad kam don jingïadei kaba tikna bad ka jingïa-ka-jia pud hapdeng kine ki ar Jylla.
Haba kren sha ki nongthoh khubor, u la ong ba ki Myntri Rangbah jong baroh ar Jylla ki la ïakren, bad ki Regional Committee kin sa rai ïa ka lynti treikam ban shim ha ka ban pynbeit ïa kane ka jingeh.
U Bah Dhar u la ban jur ba la bthah ïa ki bor distrik ban ïatreilang bad kito kiba na shiliang Assam ban ïada na ka jingnang jur shuh-shuh jong ka jinglong-jingman.
“Kumba ka long mynta, ka jinglong-jingman ka long kaba jai-jai bad hapdeng ka jingtehlakam, bad kyrmen ba kan sa long kaba man bha ha kine ki khyndiat sngi ban wan,” u la ong haba pyntip ba ki Regional Committee kin ym pat thmu ban ïakynduh ha kane ka por.
Haba kylli, u Bah Dhar u la pynshai ba ki don katto-katne ki jaka (naduh Khanduli bad Psiar) ha shi lynter khappud kiba don hapdeng ka jing-ïa-ka-jia, hynrei katei ka jingjia ka la jia ha ka jaka ka bym don ha ka jing-ïa-ka-jia. Ki Regional Committee jong baroh ar tylli ki Jylla kin sa rai halor ka jinglong-jingman jong katei ka thaiñ.
Na ka liang u Symbud Myntri Rangbah u la kdew ba ki kam ot kba ki la sangeh noh shuwa ïa mynta, hynrei ki don ki jingpyrshang ban pyntikna ba kin sdang biang kumba ju long hadien ba la dep ban ïakren.
“Ngi kwah ban pyntikna ba hadien katto-katne sngi ba la ïakren, ka jingot kba ka dei ban long biang kumba ju long,” u la ong.
“Ngi dang peit bniah ïa kane ka kam ban pyntikna ba ka jinglong-jingman kan ym jur shuh-shuh”, la pyntikna u Bah Dhar.
