Ka jingjia aksiden ba dang shen haka surok bah NH6 khamtam eh ka surok Shillong-Guwahati ka long ka mat kaba sngewkhia bha khamtam na ka bynta ki nongleit nongwan kiba ju leit jingleit lyngba kane ka surok, kane ngim dei shuh ban ong ki jingjia ba shu jia ryngkhat khamtam haba peit ha kine ki khyndiat sngi kiba la leit ki jingjia ba shyrkhei ki la jia ha kane ka surok bad nga sngew ba ym dei ban shu ong ba ki aksiden ki ju jia.
Ki daw ba kongsan jong kine ki jingjia ba shyrkhei kidei naki jing pynher stet, ki khynnah bym pat dei ka karta ki lah da ioh ïa ki licence, ka jinglong jong ka suiñ bneng haka Ri ka jong ngi bad kaba kongsan eh kadei ka jingñiah kali haka jingbuaid.
Ha kine ki khyndiat sngi la iohi haki lad pathai khubor ba ki pulit ki la pynlong ka jing talasi khamtam ïaki kali rit bad ki kali ar shaka.
Nga ai ka jingïaroh ia ka jingtrei shitom ka jong ki. Ka pynlong ïa nga pat ban lyngoh ba balei kane ka jingleh kam treikam ïa ki truck ruh kumjuh namar la ju iohi bunsien ba haba jia aksiden da ki kali heh ka jingjulor bad ka jingïap ka kham jur.
Sa kawei kaba i thamula eh mynta ka long ba bun ki kali heh kim ïaid shuh sha ka side ba dei ban ïaid bad u nongshim pass ym banse hap ban shim pass na sha ka liang ka bym dei. Kane ka buh jingma kaba khraw bha ïa ki nongleit nongwan. Da ym pat lah ban teh lakam ïa kine nga ngeit ba ngin dang ïai sakhi ïa shibun ki jingjia ïa tyngkhuh kali haki por ki ban dang wan.
Da u Bah K Tariang
