Shillong, Risaw 10
Ka K K Picture ha ka 10 tarik Risaw 2025 ka la sdang ban pyni ïa ka phlim ‘Dribar Taxi’ ha Bijou Cinema, kaba kane ka phlim kadei kaba batai ïa ka jingim bad ka jingkynduh jingeh ki nongñiah kali ha ka kam kaba ki im ban kamai man ka sngi bad pyndap pynbiang ïa ka ïing ka sem bad ka jingkynduh bapher-bapher jong ki.
Ha kane ka phlim u Bah Hilarius Kharbikhiew u la shim ïa ka bynta kum u tyngshop pdeng, ka samla Shimtilang Khyriem kum ka puron pdeng bud sa u samla Samuel Khongjam kum u tyngshop bynrap uba hajan eh jong u tyngshop pdeng bad kiwei-kiwei.
Haba ïoh ban ïakren bad u Director bad u nongpynmih ïa kane ka phlim ‘Dribar Taxi’ u Bah Kevin Kharmalki, u la ong ba ka jingshna ïa kane ka phlim ka dei ka jingsngewtynnad jong u bad kaba la pynlong ïa u ban shna ïa ka ‘Dribar Taxi’ ka dei namar ba u sngewtynnad ban shna ïa ki phlim kiba don jingïadei bad ka jingim ki paidbah, kumjuh ruh ba u la long teng kum u nongñiah taxi ha ki por ba kham mynshuwa.
“Ka jingim u Draibar kam dei tang ha kaba ñiah kali, hynrei man ka sngi da ki phew ngut ki briew u hap pynpoi sha ki jaka bapher-bapher bad u hap don ruh ka jingkitkhlieh ïa ki ‘passenger’ bad kumjuh ruh ha ïing ha sem u hap ban pyndap pynbiang ïa ki jingdonkam na ka jingkamai ba u ïoh, ka jingim kum u nongñiah taxi ka dei kaba hap mad shibun ki jingeh.” la ong u Bah Kevin.
U Bah Kevin u la ong ba ki khana ha ka Ri Khasi ki bun bha ban shna phlim bad kane ka phlim ‘Dribar Taxi’ ka dei tang ka jingsdang bad un sa dang bteng ban pynmih shuh ïa ki bynta ba ar jong kane ka phlim.
U la ong ba ka jinglut jingsep ha ka ban shna ïa kane ka phlim ka la poi kumba arphew lak tam eiei namar ba ka ka jingshna, jingpynwandur ïa kane ka phlim ka la shimpor bha bad la sdang ban ringdur naduh u snem 2019.
U la pynpaw ruh ka jingsngewnguh ïa ki paidbah kiba la wan ban ai jingkyrshan ha kane ka sngi sdang ban pyni ïa kane ka phlim ha Bijou Cinema, kumjuh ruh u la kyrpad ïa ki paidbah ba kin wan ban sakhi ïa kane ka phlim katba ka jingpyni ka dang ïaid.
Ha ka sien pyni ba ar ïa kane ka phlim, la ïoh ruh ka jingkyrshan na ka Kong Ampareen Lyngdoh MLA ka East Shillong, ka Synjuk ki Nongñiah Taxi Sor bad Khapsor bad kumjuh ruh ki paidbah.
