Shillong, Risaw 10
U Bah Pranshon Jala, President ka Sengbah Nongshad Nongkheiñ ki Hynñiewskum Ki Hynñiewtrep kaba don ïa ka jaka treikam ha Baniun, Upper Shillong u la batai ba lada jia ba shah pynïap ha u menshohnoh kan shem shitom ban lap ïa ki sakhi satar.
Kane ka jingpynpaw u bah Pranshon Jala ka dei ha ka jingïakren bad U Nongsain Hima hadien ba kiba haïing jong kawei na ki longïing kiba shah pynïap jong I heprit ha kawei ka shnong ha Nongrah ki suba ba ka dei ka jingpynïap ki menshohnoh.
U Bah Pranshon u dei ruh uwei na ki riew tymmen uba ju duwai ïa ki briew kiba ïoh ksuid, kiba shah ot shñiuh ot jaiñ ha kiba ri thlen bad kiwei de ki jingpang kiba ki briew ki ïoh.
U la ïathuh ba baroh kum ka jaidbynriew ki tip ïa u menshohnoh bad ki tip ïa u thlen hynrei ka aiñ pat kam ithuh namar ïa ka aiñ la shna da ki bor jong ka ri India.
U la batai ruh ba u thlen um don sha Rithor ne sha phareng namar ka jingngeit ka ïapher bad ka jaidbynriew hynñiewtrep.
Shuh shuh u la ïathuh ba u thlen u dei u ksuid kaba ki briew kim ïohi ne kim ïoh ktah.
U la batai biang ba ka jingmih u ksuid ka dei namar u khun bynriew ha ki por mynshwa u rhah spah, u kwah ba ka kamai kajih kan ïoh kham bun naduh ka por ba ïakylliang ki mar ki mata haduh ba mih ka pisa.
“Haba ki briew kiba rhah spah ki pan shipan na u ksuid kumta u ksuid ruh u pan kylliang da ka snam briew ban ai shisien shisnem” u la ong.
U Bah Pran u la ong ba kito ki ïing kiba hiar pateng lada ki kohnguh ban ai briew, u thlen u la kyrkhu ïa ki hynrei ki bym kohnguh, kato ka longïing ka mad shibun ki jingeh.
“Kaba lyngngoh ba ngim ju ïoh ban kem ïa u menshohnoh namar u la don ka bor jong u ksuid ban dih ïa ka kyiad thlen namar haba iaid u menshohnoh ha ka wah um jhieh u iaid ha jaka dum um lei-lei” u la ong.
Shuh shuh u la batai ba ki menshohnoh haba ki la ïoh bat ïa u briew ki la tan snam da u thyrñia ne da u pin barit na khmut tyrsim ne khap ïa u shniuh hadien kata ki sa pynïap, dei na kane ka daw ka shem shitom ban lap sakhi haba pynïap briew da u menshohnoh.
U la ong ruh ba shisien ba pynïap menshohnoh ki ju pyni beit sha ki trai ïing khnang ba u thlen un ïoh ban bam suk ïa ka snam jong uto uba la pynïap.
“Nga la duwai shibun ngut ki briew kiba nga la lah ban weng naka jingshah khap shñiuh shah khap jaiñ hynrei kito kiba leh ïa kane ka kam bymmaw ki ruh ki mad la ka jong ka bainong” u la ong.
U la ïathuh ruh ba u menshohnoh um nud ban kem ïa uba eh rngiew lada dei ïa u khynnah ne rangbah hynrei u kem tang ïa kiba jem rngiew.
