Nongpoh, Risaw 10
U nongïalam ka Khasi Students Union, North Khasi Hills District, u samla Ferdynald Khar-kamni, u la byrthen ba ka seng kan hap ban leit khang khyrdep noh ïa ka jaka khrong khajna jong ka National Highway Authority of India (NHAI) ha 20 Mer Pahammawleiñ ha Ri-Bhoi District lada ka dang ïai bteng ban pynslem bad leh kum ha ki snem kiba mynshuwa.
Kane ka jingbyrthen jong utei u nongïalam ka KSU, ka dei hadien ba ka seng ka la dep ban ïakynduh ïa u DC ka Ri-Bhoi, u Abhilash Baranwal ha ka Sngi Thohdieng ha ryngkat ki nongïalam skul, ki nongïalam shnong ka thaiñ Nongpoh ban pynkynmaw biang ïa ki mat jingdawa kiba ki shnong ka thaiñ Nongpoh bad ka seng, ki la dawa naduh u snem 2016.
Utei u nongïalam u la ïathuh ruh ba naduh utei u snem ki la dep ban ai dorkhast sha u Deputy Commissioner ka Ri Bhoi District na ka bynta ban pyntreikam ïa ki mat jingdawa kiba dei na ka bynta ka jingshngaiñ bad ka jingbha jong ki paidbah ka thaiñ Nongpoh, hynrei ki shu kut tang ha ka jingleit jurip bad pynsyrwa kai ïa ka por.
U samla Kharkamni u la ïathuh ba kitei ki mat jingdawa ki kynthup naduh ka jingpynbiang ïa ki light ha ki jaka kiba kham kongsan jong ka sor Nongpoh, ban buh ïa ki ‘Zebra Crossing’ ha ki jaka ba jam na shilliang sha shilliang surok, ban maramot ïa ki thliew, ban shna ïa ki jaka ïaid paidbah najrong surok (flyover footbridge), ban pynïar ïa ki nala um bad ban shna bha ïa ki kum ki jaka ïaid kjat nalor kiwei-kiwei.
Halor ka jingshlei um ka sor Nongpoh wat tang lada hap slap kumba ar kynta eiei ruh, utei u nongïalam u la pynpaw ba ka daw ka long ba ki wahrit kiba ju don mynshwa, la pynkylla noh kum ki nala kiba rit bad kane ka pynlong ïa ka jingshlei um ha kiba bun ki jaka jong ka sor Nongpoh.
U la ong ruh ba ka NHAI ka dei ban shimkhia ban pynheh biang ïa ki nala um khamtam harud ki ‘Service Lane’ bad ruh ban tap bha ïa ki ban pynlong pat kum ki jaka ïaid kjat kiba biang bad itynnad na ka bynta ki paidbah.
Utei u nongïalam u la ong ruh ba kam don jingmut satia ïa ka NHAI ba kan khrong khajna lada kam lah satia ban pynbiang ïa kitei ki jingdonkam jong ki paidbah bad kyntu ïa u DC ka Ri Bhoi ba un shimkhia halor kane ka mat bad pynpaw ruh ïa ka jingkyrmen ba hapoh ka shi bnai, la dei ban ïohi ïa ki dak ki shin, ym shuh ban slem kumba long mynshwa, lym kumta ka seng kan leit ban khang noh ïa katei ka jaka khrong khajna jong ka NHAI kaba don ha 20 Mer Pahammawleiñ.
