Shillong, Risaw 10
U Bah Heavingstone Kharpran MLA na Mawryngkneng Constituency u la pynrem jur ïa ka jingjia ba sngewsih ba shah pynïap u heprit Kyrshanbor Kharmudai ha Nongrah kaba la pynshong syier ïa ki nongshong shnong bad u la dawa ba ki bor jong ka aiñ ki dei ban shimkhia ban thwet ïa kiba donkti bad ban pynshitom.
Haba ïoh ban ïakren ïa u Bah Heavingstone ha ka step jong ka 10 tarik u Risaw 2025 ha ka por ba u leit sngewlem ha ïingsah u heprit Kyrshanbor Kharmudai kaba dei ruh ka sngi ban leit ontep ïa u, u la ong ka long kaei-kaei kaba sngewsih ba kum kine ki jingjia ba sngewsih dang khyndiat taïew ka dang jia ka jingshah pynïap ka khynnah rit hapoh ka shnong nongrah, mynta bud sa ka jingshah pynïap u heprit Kyrshanbor Kharmudai kaba la pynkyndit ïa ki nongshong shnong ba kum kine ki jingjia ki iai bteng ban jia.
U la ong, halor kane um pat nang ban kren eiei namar ba ym pat lap ïa kiba leh ïa kane ka kam kaba shyrkhei bad ba ym pat tip kaei ka daw hynrei kane ka la pynsngew syier ïa ki kmie ki kpa bad ki nongshong shnong baroh kawei. U Bah Heavingstone u la pynrem jur ïa kane ka jingjia, kaba pynshong syier ïa ki nongshong shnong bad u la kyrpad ïa ki bor jong ka aiñ ba kin shimkhia ban thwet ïa ki briew kiba donkti ban pynïap dusmon ïa u heprit bad ban pynshitom ruh ïa kita kiba donkti katkum ki kyndon ka jong ka aiñ.
Shuh-shuh u la kyntu ïa ki bor shnong ba kin ïatreilang bad ki bor jong ka aiñ khnang ban lah ban khanglad ïa ki jingsniew hapoh ki shnong ki thaw bad ki jingshah pynïap dusmon ki khynnah rit kumba ladep jia, kumjuh ruh ki kmie ki kpa ki dei ban husiar bha ïa la ki khun nangne sha khmat namar ka jingjur ki kam sniew kiba kum kine ki jingjia ki bym pat ju jia koit ha ka imlang sahlang ha ki por ba kham mynshuwa. Ha kaba ïadei bad kane ka jingjia u la ong ba un sa rah ban ïakren hapoh ka ïingdorbar thawaiñ ha ka dorbar ban sa long shen ban ïakren ïatai bad ban lah ban rat dyngkhong ïa kum kine ki jingjia ba kin nym jia shuh nangne shakhmat.
