Kabul, Risaw:
Ki paidbah nongshong shnong ka nongbah Kabul, la ong ba ki la iohsngew ia 2 tylli ki jingbthei kiba khlaiñ bor bha, kiba la pynkhynñiuh ia ka phang pdeng jong ka nongbah Kabul jong ka ri Afghanistan ha ka janmiet jong ka Sngi Palei, la iathuh ki lad pathai khubor jong ka Kabul.
Ka jingbthei kaba nyngkong eh kaba la pynrah mynsiem ia ki paidbah nongshong shnong jar ka la jia ha ka por 9:50 baje mynstep bad ka bud pat sa kawei ka jingbthei kaba ar hadien kumba katto- katne minit.
“Katei ka jingjia, ka dang don hapdeng ka jingtohkit, hynrei la ioh jingtip ba ym pat don kano- kano ka jingjia kaba sngewsih haduh mynta bad baroh kiei- kiei ki ïaid beit- ïaid ryntih kumba ju long”, la ong u nongaiktien ka sorkar, u Zabihullah Mujahid, hapoh ka rynsan X bad u la bynrap shuh- shuh ruh ba ia ki jingtip ba kham bniah, yn sa pynshai kham hadien ynda la ioh ia ki kaiphod ba pura.
Katba ha ki rynsan Social Media, la don katto- katne ngut ki briew ki la iathuh ba ki la iohsngew ia ki jingbthei bad ki la iohi ruh ia ki drone ha katei ka jaka ba bthei.
Ha ki surok jong ka nongbah, la pyntip ia kiba bun ki bor pahara bad ki dang talasi ia ki kali, la iohi uwei u nongthoh khubor. Ka jingshakri mobile ka la hiar ha ki katto katne ki dong.
Ha katei hi ka Sngi Palei, u Myntri ka tnat kam bar ri jong ka Afghanistan, u Amir Khan Muttaqi, u la wan poi sha India naka bynta ka jingwan jurip kaba ar sngi, kaba long ruh ka sienjam kaba thymmai bad kaba nyngkong hadien ka jingpyrshang jong ka sorkar Taliban ban ioh ia ka jingkyrshan na ki ri ka pyrthei, ha kaba, ka Russia mynta ka dei tang ma ka ka ri kaba ithuh ia ka Islamic Emirate.
