Shillong, Risaw 10
Ka Muaythai Association of Meghalaya, lyngba u President ha ka 10 tarik Risaw 2025 hapoh ka Shillong Press Club ka la pyntip ba la shah jied ar ngut ki khynnah lehkai napoh ka jylla, ka Alphonsa Zinia 16 snem ka rta bad u Andy Taro 17 snem ba kin leit shim bynta bad mih khmat sha ka “3rd Asian Olympic Youth Games” ka ban long naduh ka 22 tarik bad kan kut haduh ka 30 tarik mynta u bnai Risaw, ha Bahraiñ.
U Bah Angelus u la pynsngew ba ka Jylla Meghalaya ka la don ka jingkmen kaba khraw namar ba arngut ki nongïalehkai na ka Jylla kin ïoh ïashim bynta ha katei ka lympung kaba long ha Bahraiñ.
Kine ki arngut ki la shah jied ban mihkhmat na ka ri India ha kane ka lympung ïalehkai ba heh tam jong ka ri Asia.
Ki nongïalehkai bad ki ‘official’ ki pynpaw ka jingsngewkmen bad ka jingsngew sarong ba ka Jylla Meghalaya ka la don bynta ha kane ka kynhun, ka kynhun ka ong ruh ba baroh ki jinglut jingsep la ai da ka Sorkar bad da ki nongkyrshan jong ki, ban pynthikna ba kine ki arngut kin lah ban ïashim bynta khlem jingeh.
