Shillong, Risaw 10
U Nongïalam ka Liang Pyrshah, u Dr. Mukul Sangma u la pynpaw ïa ka jingsngewkhia kaba jur halor ka jinglong-jingman ka shongsuk shong shngaiñ ha ka Jylla, khamtam haba ïadei bad ka jingïap ba dang shen jong arngut ki khynnah rit.
Katkum ka jingong jong u, ka donkam ïa ka jingsngewthuh kaba bniah halor ki jingeh kiba don ha sawdong, jong ka jingbym kheiñ shuh ïa ka aiñ bad ki kam runar ha ka Jylla.
Haba kren sha ki lad pathai khubor ha ka Sngi Thohdieng, u Dr. Mukul u la ban jur halor ka jingdonkam ban shimkhia ïa ki kam runar kiba rit ba ria, kiba u ngeit ba ki lah ban ïalam pat sha ki kam runar kiba kham khraw.
U la kdew ba ki jingjia jong ki kam tuh kam thiem, kam tuh masi, bad kiwei-kiwei ki kam runar ki la nang jur ha ki jaka nongkyndong, bunsien kaba kynthup ïa ka jingdon bynta jong ki kynhun kiba la pynbeit ryntih.
U Dr. Mukul u la kynthoh ruh ïa ka Sorkar ba kam shym la leh eiei ban pynkhlaiñ ïa ka tnad pulit, da kaba kdew ïa ka jingduna ha ka bor briew kum ka jingeh kaba khraw. U la pynpaw ba u la ïakren bad uwei u heh pulit uba la pynpaw ïa ka mat jong ka jingduna ha ka liang ka bor briew, kaba pynthut pat ïa ka jinglah jong ki pulit ban ïakhun pyrshah ïa ki kam runar ha ka rukom kaba paka.
U Myntri Rangbah barim ka Jylla u la buh jingkylli ruh halor ka jingshimkhia ka Sorkar ha ka ban pyntreikam ïa ka Meghalaya Resident Safety and Security Act, kaba la pynwandur khnang ban ai bor ïa ki shnong ki thaw ban ïatreilang bad shimkhia ïa ki jingeh ha ka liang ka jingshngaiñ bad jingïada.
U la kdew ba ki kyndon jong ka aiñ, kum ka jingbuh ïa ki CCTV ha ki jaka ba donkam, kim shym la lah ban treikam pura.
U Dr. Mukul u la pynpaw ruh ïa ka jingsngewkhia halor ki kam ba lait ha ki thanad bad ki kynhun pulit ne ‘Battalion’, kaba u ngeit ba ka dei ka jingthmu ban pyndkoh ïa ka tnad pulit.
U la buh jingkylli ïa ka jingthmu ba sha lyndet jong ka Sorkar halor ka jingbym pyndap ïa kine ki kam ba lait, da kaba kdew ba ka lah ban dei ka jingpynduna ïa ka jinglut-jingsep ne ka jingbym pyrkhat ïa ka jingshngaiñ jong ka Jylla. Na ka liang u Nongïalam ka Liang Pyrshah, u la ban jur halor ka jingdonkam ïa ka sienjam na bynta ka sor kaba shngaiñ, kaba ïadei dur bad ka prokram “Safe and Secure City” kaba u la sdang ha ka por ba u long kum u Myntri Rangbah ka Jylla.
“Kynmaw ha ka por jong ngi haba ngi la ïoh ïa ka kabu ban pynïaid ïa ka Sorkar, ka la don ka prokram kaba nga la plie ha kaba ïadei bad ka Shillong, ‘Safe and Secure City’, ïa kane kajuh la leh lang na ka bynta ka Tura, ïa kajuh ka kam la dei ban leh la pynjlan sha baroh ki nongbah jong ki distrik, kaei-kaei kaba la sdang katkum ka jingsngewthuh kaba laitluid jong ngi halor ki jyrwit-jyrwat jong ka jingeh haba ïakhun ïa ka bynta jong ka shong suk shong shngaiñ bad ki kam runar. Ïa kane la dei ban pynkhlaiñ shuh-shuh ha ka jingmyntoi ba la leit noh jong ka Jylla. Mynta, klet noh ïa ka jingpynheh, kine ki CCTV bad ki jingtei baroh kiba ngi la wanrah ki la jah rngai noh ha ka por kaba kynsan-kynsan. Hato la leh khnang ban ai lad ïa ki katto-katne ki kam runar ban wan jia bad ban shu ïaid kumto khlem da tip da ki bor ba dei khmih ?”
Nalor kane, u la khot la wer na bynta ka rukom treikam kaba bniah ban weng ïa ki jyrwit-jyrwat jong ka shong suk shong shngaiñ da kaba kynthup lang ïa ka imlang-sahlang bad ki bor shnong.
