Shillong, Risaw 10
Ka Wrestling Federation of India (WFI) ha ka sngi Ba-ar ka la sospon shisnem ïa u nongjop takma rnong ha Paris Olympic u Aman Sehrawat hadien ba une u ‘rangïalehkai ba 22 snem ka rta u la palat ïa ka jingkhia kaba 57 kg ha ka World Championship ha Zagreb, Croatia ha u bnai ba la dep.
Ka jingpynsangeh ne ka jingsospon, kaba sdang naduh ka 23 tarik u Nailur, kaba khanglad ïa u Sehrawat ban ïashim bynta ha kino kino ki kam ba ïadei bad kane ka jingïalehkai ïalympat, ha ka ri bad ha ka pyrthei, haduh u bnai Nailur 2026. U President ka WFI, u Sanjay Singh, u la ong ba ka jingkynthoh jong u nongïalehkai ïa kane jingpynbna pynshitom ka long kaba “bym sngewhun.”
“La ai jingmaham ruh ïa ki nonghikai jong u Sehrawat. La ai por shi taïew ïa une u nongïalehkai ban jubab shwa ban shim ïa ka sienjam kaba khatduh,” ong u Singh ha ka IANS.
Ka komiti pynshitom ka la kdew ba u Sehrawat u la rung ha ka jaka pynkhreh ha Porec, Croatia, 18 sngi shwa ka jingïalehkai kaba la buh ka por jong u ha ka 14 tarik u Nailur, kaba la ai por ïa u ban pynneh ïa ka jingkhia bad ka jingkoit jingkhiah katkum ki kyndon.
Kane ka dei ka jingshah pynshitom kaba lai kaba la ktah ïa u nongïalehkai na India ha u snem ba la dep, hadien ba ka Vinesh Phogat ka la shah weng noh na ka Paris 2024 Olympics bad ka Neha Sangwan ka la shah pynduh noh ha ka lympung ïalehkai World Under-20 Championship 2025 namar ka jingpalat ha ka jingkhia bad ka jingkoit jingkhiah.
Kane ka jingkhang shisnem kan ktah ïa ka jingpynkhreh jong u Sehrawat na ka bynta ka Asian Games 2026, kaba la buh ban long naduh ka 30 tarik Nailur haduh ka 3 tarik Risaw, lymda ka WFI kan pynkylla noh ïa ka rai jong ka.
