Shillong, Risaw 10
Ka kynhun ïalehkai ka Laitkor SC, ka la ïeng ïakhun tyngeh, pynban wat la katta ruh kam shym la lah pat ba kan khanglad ïa ka kynhun ïalehkai ka Langsning FC ba kan jop ïa ka, ha ka jingïakhun ka lympung Shillong Premier League 2025, kaba la long hynne ka nohphai sngi ha madan jong ka SSA Stadium First Ground, Polo.
Ïa ki ar kol kiba kordor tam ka Langsning FC la thep da u Nelson Rymbai (14) bad u Chusrang Sangma (18′), hynrei ka Laitkor SC kiba juh ïai pynpaw ïa ka mynsiem ïakhun ka bymjukut ka jong ki, ki la ïoh ïa ka kabu ban pynphai kylla ïa ka shi kol ka jong ki lyngba u Fridison Wanniang (55′).
Kumta, da kane ka nam jop kaba hynne ka janmiet, ka Langsning FC ka la bteng ba kan jam shakhmat sha ka thong ba kan ïaknieh ban rah ïa ka nam kum ka lahduh, kaba la wan ba da ka jingjop kaba mynta ka sngi, ka la ïoh ba kan khur 17 poiñ bad sah sa artylli ki jingïakhun ha ki kti ki jong ka, ha ka juh ka por ba kan tam da kumba 2 poiñ ïa ka kynhun ïalehkai ka Shillong Lajong FC bad Mawlai SC.
Katba na ka liang ka Laitkor SC, kaba shah rem mynta ka sngi, kan pynlong ïa kaba kan neh ha ka kyrdan kaba 7 mar ïaryngkat bad ka kynhun ïalehkai jong ka Mylliem tangba ka jingïapher jong ki ka mih paw noh ha ka dur jong ka ‘head to head’.
Haba phai sha kane ka jingïakhun, khyndiat ka la buh jingeh ïa ki ‘rangïalehkai jong baroh ki ar kynhun ban sei madan ïa kata ka buit ka sap bad ka jingtbit ïalehkai ka jong ki, hadien ba sa shisien ka madan kam shym la ailad ïa ki hadien ka jingwan ban ther ka jong u slap naduh shwa ban sdang kane ka jingïakhun.
Wat la katta ruh, na ka liang ka Langsning ka la kham kyntiew ïa la ka rukom ïalehkai ka jong ka, kampher ba ka la don ki khep ba ka la duh ïa la ki kabu ksiar ba ka la ïoh ban pynurlong ïa ki sha ki kol, tad haduh ka khyllipmat ka kol kaba nyngkong lyngba u Nelson, ïa kaba ym slem hadien kane, ka la dei pat ka khep ïa u Chusrang, ba un ïoh ïa ka kabu kaba paka ban khyrwit jam bha ïa ka bol ban lah ban pynkhih biang sa shisien ïa ka jar.
Hadien kane, u slap ula sdang ban bteng ha ka ban ther kham tyngeh, kaba la nang buh jingeh bha ïa ki ‘ranglehkai ban lah ban ïalehkai ha ka rukom kaba dei, hynrei ha shwa ban bteng ha ka kylla miet, u slap u la kham duna, kaba hangne ka la plie lad ïa ka Laitkor ba kan sdang ban kyntiew ïa ka rukom ïalehkai ka jong ka tad haduh ba kan da ïoh ba kan thep ïa kane ka shi kol da u Fridison Wanniang.
Ha kum kane ka por jong ka jingïakhun shipor ym lah ban batai ba shano uta u sawar ka nam jop un noh, ne ka jingïakhun ka lah ruh ba kan poi sha ka jingïakhaid, hynrei, ka Langsning FC lyngba ka jingtbit bad shemphang bha ki ‘ranglehkai ki jong ka, ki la lah ban ïeng skhem hi triang tad haduh kaba kut bad ban lah syndon ban wanphai bad ka jingjop napdeng ka madan ïakhun.
Ha ka 11 tarik Risaw 2025 ka jingïakhun ha kane ka lympung kan long hapdeng ka Mylliem pyrshah ïa ka Nangkiew Irat ka ban long ha ka por 4:30 nohphai sngi.
