Nongpoh, Risaw 10
Ki pulit ka Ri Bhoi District ki dang pynlong ïa ka jingthwet kaba jur ïa uwei u runar uba la suba donkti ban leh be-i-jot bad pynïap dusmon ïa kawei ka heprit kaba dang 13 snem ka rta ha kawei ka shnong kaba hap ha Ri Bhoi District.
Katkum ka tyllong khubor na ki bor pulit, la ïathuh ba ki ophisar pulit ha ryngkat ka kynhun jong ka Meghalaya Forensic Crime Scene Unit (MFCSU) ki la pyndep ban shim ïa ki sakhi sabut na ka jaka ba katei ka heprit ka la shah leh be-i-jot bad shah pynïap bad la pyndep ruh ïa ka eksamin ‘Post-Mortem’ bad kiwei de ki jingdonkam katkum ki kyndon aiñ ha Nongpoh Civil Hospital.
Shuh shuh, la ïathuh ba na ka liang ki bor pulit ki la ïoh ksai ïa uwei u runar uba la suba donkti halor katei ka kam, uba la phet rieh naduh hynnin hi ka sngi jong katei ka jingjia bad ka jingthwet jur ban ïoh kem ïa u ka dang ïaid shakhmat, la ïathuh ki bor pulit.
