Washington, Risaw:
U President jong ka America, U Donald Trump, ha ka jingkwah palat jong u ban ioh ia ka khusnam ‘Nobel Peace Prize’, u la kynthoh jur ia ka jingjop jong U Barack Obama, uba la mih hashuwa jong u, da kaba kynnoh ba um shym la leh eiei hynrei u la pynjot pynban ia ka ri America.
Haba iakren bad ki lad pathai khubor, U Trump la pynpaw ïa ka jingjop jong u, ha kaba pynïoh ïa ka jingsuk ha Gaza bad ban pynkut noh ïa ki “8 tylli ki thma”, hynrei, u la kam ba um shym la leh ïa katei ka kam, na ka bynta ban ïoh khusnam, pynban ba un wanrah ia ka shongsuk- shongsaiñ ha ka pyrthei.
Tang katto- katne kynta shwa ban pynbna ïa kane ka khusnam, u Trump u la kynthoh ba u Obama u dang don tang katto- katne bnai ha ka jinglong President jong u, haba u ïoh ïa ka khusnam Nobel Peace.
“U la ioh ia ka namar ba um shym la leh ei ei. U Obama u la ioh ia ka khusnam – um tip wat ia kaei – u la shah jied, bad ki la ai ia ka sha u Obama namar ba um shym la leh ei ei satia hynrei ban pynjot ia ka ri jong ngi,” la ong u Trump.
U Obama u la don 8 bnai ha ka samoi treikam ba nyngkong jong u haba u la ioh ia katei ka khusnam kaba donburom ha u snem 2009. Kane ka jingleh ka la pynkyndit ia kiba bun ki briew, ha kaba ka kot khubor laitluid jong ka New York Times ka la iathuh ba katei ka jingithuh ka long kaba ‘slem bha’ bad ka la kynthoh ba ka Nobel ‘ka dei ban don ia ka kyndon kaba kham heh,’ ym ban shu pynkupburom khlem da bishar bniah bha ia ka jinglah bad jingdon hok jongki ban ioh ia katei ka khusnam.
“Nga la pynsangeh ia ki 8 tylli ki thma, kumta kata kam pat ju jia mynno mynno ruh – hynrei kin hap ban leh ia kaei kaba ki leh. Kaei kaba ki leh ka long kaba bha. Nga tip ia kane: Ngam shym la leh na ka bynta kata, nga la leh namar ba nga la pyllait im ia shibun ki mynsiem briew,” la ong u Trump.
