Washington, Risaw:
U President Donald Trump, ha ka Sngi Palei, u la ai jingmut ba dei ban beh noh ïa ka Spain na ka kynhun NATO namar ka jingbym lah jongka ban pynïahap ïa ka jingpynlut pisa kaba kham ha ka liang ka jingïada ri kaba u la buh.
“Ngi la don kawei ka nongsahdien, ka dei ka Spain”, la ong u Trump ha ki nongthoh khubor ha ka ophis Oval. “Kim don daw ban nym leh ia kane, hynrei kata ka long kaba dei. Lehse phi dei ban beh noh ia ki na ka NATO da kaba beit.”
Ha u Jylliew, ka seng North Atlantic Treaty Organization kaba don ia 32 tylli ki ri kum ki dkhot jongka, ka la mynjur ban pynkiew shibun ïa ka jingpynlut ha ka kam ïada ri ha ki phew snem ban wan hapoh ka jingpynbor jong u Trump, uba ha katei ka por u la byrngem ban pynshitom ïa ka Madrid halor ka khaïi- pateng namar ba ka la pyrshah ïa ka thong ba thymmai jong ka 5% na ka GDP.
U Myntri Rangbahduh jong ka Spain, u Pedro Sanchez, uba dei u nongsynshar socialist, u la kyntait ba ka Madrid, kan nym donkam ban hiar thma ïa katei ka jingkheiñ ba ha khlieh duh jong ka khubor. Ka Spain ka la long kawei na ki ri NATO kaba pynlut duna tam ha ka kam ïada ri ha ka jingïadei.
U President ka US, uba la ai jingmut bunsien ba ka United States ka lah ban khanglad ia ka jingiada na ki ri Europe ki bym kwah ban pynlut kham bun ha ka laiñ iada ri, u la pynrem lyngba ka jingkular ban pynlut 5% na ka GDP jongki ha ka jingpynlut kaba iadei bad ka jingiada ha ka sienjam kaba la iohi ba ka long kaba kongsan ban pynlong ia u ban iatreilang bad ka NATO.
Kata ka jingkheiñ ba kongsan ka ïapher kum 3.5 percent ha ka jingpynlut ha ka liang ka jingïada ïada bad 1.5 percent ha ki bynta kiba kham jem kum ki jingtei bad ka jingïada ha ka cyber.
Ka thong ba thymmai ka bujli ïa ka thong barim jong ka jingïatylli ban pynlut ha ka kam shipai kaba long ar percent, kaba la buh nyngkong eh ha u snem 2014.
