Shillong, Risaw 12
Ki ar ngut ki briew ki la ieh noh shadien ïa ka arshaka bad phet krad hadien ka jingshah kthong ha ki pulit.
Katkum ka khubor na ki pulit la ong ba ha ka 9 tarik mynta u bnai, ha ka por kumba 4 baje dang step, ki ar ngut ki briew kiba la ñiah da ki ar shaka, hadien ba ki la ïohi ïa ki pulit kiba dang pynlong ka jingtalasi kali ha surokbah NH-40, Mawlieh, East Khasi Hills, ki la phet krad bak sha ka liang jong ka shnong Langkyrdem.
Hadien ba la ïohi ïa kane, na ka liang jong ki pulit ki la kthong ïa kitei ki ar tylli ki arshaka, hynrei la ong ba na ka liang kitei ki ar ngut ki la ïoh lad ban phet krad da kaba ieh noh shadien ïa ki arshaka ki jong ki, kiba don ïa u registration number ML05-Y-3043 bad ML05-AC-3407.
Ha kawei pat ka khubor, la ong ba ha ka 9 tarik mynta u bnai, ha ka por kumba 8.30 mynstep, ki pulit ki la lap ïa kawei ka arshaka kaba la shah tuh, ka bym don number plate ha ka shnong Amlari kaba hap hapoh ka Muktapur PP ha West Jaiñtia Hills; hynrei la ong ba hadien ba la ïohi ïa ki pulit, u briew bym lah ban ithuh uba la ñiah ïa katei ka arshaka, u la phet krad noh da kaba ieh shadien ïa ka arshaka. Ki pulit ki la ïoh ban kurup noh ïa kane ka arshaka kaba la don ka jingjulor na ka bynta ba ju pynmeh ding (ignition).
Ha kawei pat ka khubor, ki shipai BSF na ka BOP Lyngkhat ha East Khasi Hillski la ai ka jingujor ba ha ka 7 tarik mynta u bnai ha ka por kumba 8.40 mynmiet, ki la ïoh ban kurup ïa ki ar tylli ki arshaka kiba don ïa u registration number ML05-AD-3234 bad AS02-AG-8077 na kawei ka khlaw kaba don bad hap hapoh ka BOP Lyngkhat. La ong ba kham hadien ïa kine ki arshaka, la aiti noh sha ki pulit jong ka thanad ha Pynursla.
