Shillong, Risaw 12
Ka Meghalaya Police Football Team ka la bteng ïa ka jingjop kaba lai ha ka lympung ïalehkai 1st Division Football League 2025 ba la pynïaid da ka Shillong Sports Association (SSA) hadien ba ka la pynliem noh ïa ka Mawtawar SC da 3-0 kol ha ka sngi Saitjaiñ.
U Pynshailang Lyngkhoi u la thep ar kol bad ïa kawei pat la thep da u Everest Tarly Rynjah na ka bynta ban pynlong ïa kane ka kynhun ban bteng ïa ka jinglamkhmat da kaba kamai 9 point na ki lai sien ïakhun.
Haba phai sha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang. Hynrei hadien shiteng kynta ka la lah ban pyni ïa ka jingtbit ha ka rukom ïalehkai bad la la ïoh ban pynkhihjar nyngkong eh lyngba u Pynshailang ha ka minit kaba 36 na ka bynta ban tam shi kol ha ka kylla step.
Hadien katto katne por ba la bteng ïa ka jingïakhun jong ka kylla miet, u Pynshailang u la pynbud biang ïa ka kol kaba ar jong ha ka minit kaba 75 hashwa ba u Everest un thep ïa ka kol kaba lai ha ka minit kaba 89 na ka bynta ban pynlong ïa ka MLP ban khur syndon ïa ka jingjop.
Ka jingïalehkai ha ka lah sngi U Blei kan long hapdeng ka Nongrah SC pyrshah ïa ka Mawkhar SC ha ka por 1:30 mynsngi.
