Shillong, Risaw. 12
Ka Sacred Heart Theological College (SHTC) ka la pynkut noh ïa ka ka “Sacred Heart Youth Fest 2025” ha kaba palat 2,500 ngut ki khun samla ka Balang ba na kylleng ka Jylla Meghalaya ki ba la wan ban ïashim bynta.
La sdang ïa kane ka sngi da ka Iukharist Bakhuid ba la knia bad pynbynta da u Rev. Fr. Bivan Rodrigues Mukhim, Vice Provincial jong ka Salesian Province jong ka Guwahati (ING) Ïa kane ka jingïakynduh lang la sdang da ka jingtbeh ïa ka sharak, nangta bud da ka jingshad bad ka jingkren pdiang sngewbha da u Rev Fr. Sunil Barla SDB, Rector ka SHTC.
Ha kane ka Sacred Heart Youth Fest 2025 ka la don ki jingshad tynrai kum ka jingshad Wangala da ki samla Garo, jingshad Khasi na ki samla ka Diengpasoh bad ka jingshad Mizo da ki samla Mizo, baroh ki lah pynpaw ïa ki jait jingshad bapher-bapher jong ki.
La pyni ïa ki jingshad ba itynnad na ki Oratory bad ki shnong bapher-bapher kiba kynthup ïa ka Siejiong, Smit, Ummir, Nepali Community, Pynthorrit, Boro Community, Mawtawar, Mawkynroh, Mawkasiang, Mawpun, ANKCYAS, Mawsiatkhnam, Nongthymmai, Langkyrding, Santhali Community, Langkyrding Mihngi, Mathumthum bad Mawïong.
Ka jingwanrah ïa ka jingrwai jingshad na man la ki kynhun ka long ban pynpaw ïa ki jinglong ba kypang jong baroh ki thaiñ bapher-bapher.
U Bah A.L. Hek, MLA ka Pynthorumkhrah u la long u Kongsan, haba ai jingkren u la ai ka jingïaroh ïa ki samla namarba ki long “ki nongkit khubor jong ka jingsuk, ka jingngeit bad ka kolshor” ïa kane ka jingïakynduh ba shisien shi snem jong ki samla la pynkut da ki jingrwai, jingshad ba la ïalam da ki khun samla jong ka Vendrame Festive Oratory Mawlai.
