Shillong, Risaw 12
Ka nongbah Shillong kan pdiang ïa ka jingwan ïalehkai paralok hapdeng ka kynhun ki ‘thei ïalehkai ka ri India bad Nepal, kaba la thmu ban pynlong ha ka 27 tarik mynta u bnai ha Jawaharlal Nehru Stadium, Polo.
Kat kum ka khubor ba la pyllait da ka All Nepal Football Association ha ka taïew ba la lah, la ong hashwa katei ka jingïalehkai paralok, ka Nepal kan pynkhreh ruh ïa ka jingïalehkai pyrshah ïa ka Iran ha kane hi ka nongbah ha ka 24 tarik mynta u bnai
“Ka Nepal kan ïakynduh pyrshah ïa ka Iran ha ka 24 tarik u Risaw, hadien kan ïakynduh pyrshah ïa ka India ha ka 27 tarik u Risaw. Ïa baroh ar kine ki jingïalehkai yn pynlong ha Shillong,” la pyllait ka ANFA ha ka rynsan social media jong ka.
La ong ba kine ki jingïalehkai paralok ki long kiba kongsan na ka bynta ka Nepal ba kan lah ban jam sha kiwei pat ki kyrdan. Kumba ka long mynta ka India ka don ha ka kyrdan ba 63, katba ka Iran ha kaba 70 jong ka FIFA Women’s World Ranking. Ha kawei pat ka liang ka Nepal ka don ha ka kyrdan ba 89.
Watla ka ANFA ka la pynbna ïa kitei ki jingïalehkai kiba la thmu ban pynlong ha kane ka nongbah, hynrei na ka liang ka All India Football Association (AIFF) kam pat shym la pynbna eiei shaphang kane ka jingïakhun.
Na ka liang ki bor Sorkar lem bad ka Meghalaya Football Association (MFA) kim pat shym la lah ban pynthikna eiei halor kine ki jingïalehkai ki ban long ha Shillong, hynrei ki la long ba la khreh ban pdiang lada jia ba ka AIFF ka pynbna ban pynlong ha kane ka nongbah.
Kumba ka paw ha u Lber mynta u snem ka Shillong ka la ïoh ban pynlong teng ïa ki ar tylli ki jingïalehkai bar ri jong ki kynhun ïalehkai ki shynrang. Ha ka 19 tarik u Lber ka la pynlong ïa ka jingïalehkai paralok ha kaba ka India ka la jop da 3-0 kol ïa ka Maldives bad ha ka 25 tarik ka India ka la ïakhaid khlem don bathep kol pyrshah ïa ka Bangladesh ha ka Group-C jong ka AFC Asian Cup 2027 Qualifiers.
