Nongstoiñ, Risaw 12
Ha ka sngi Saitjaiñ jong ka taïew ka Banarig Foundation kala ïoh ban sdang ban pynlong jingïalang ai jinghikai ïa ki khun samla ka thaiñ ba kin tip kumno ïa kaban wad ïa ki lad ki lynti ha kaban pynkhreh ïalade shuwa ba kin leit thoh ïa ki eksamin bapher bapher kynthup naduh ki DSC, MPSC, UPSC bad kiwei kiwei.
Kane ka prokram ka dei ruh ha ryngkat ka jingïatreilang ka Triumphant Institute of Management Education Private Limited (TIME), ka ophis jong u Deputy Commissioner ka West Khasi Hills District bad kaba la pynïaid da ka Banarig Foundation ïa kaba la tip ruh kum ka MLA Initiative Career Counselling & Aptitude Workshop.
Ha kane ka sngi nalor u Bah Gabriel Wahlang, MLA ka Nongstoiñ kum u kongsan la donlang ruh u Dr Soumen Das, Director of TIME, ka Trikhagni Kalita CentreManager of TIME, u samla RFenderson Nonglait uba dei u nonglam khmat ka Banarig Foundation bad kiwei ïa kaba la pynlong ha Trysem Hall,jong ka ophis u DC.
Haba kren kum u kongsan u Bah Gabriel Wahlang u la ong, ka jingangnud ka jong u na ka bynta ki khynnah samla jong ka thaiñ ka long ba ki dei ban pass bha ha ki eksamin bapher bapher khamtam, da ki phew snem mynta ym ju don uwei ruh uba la pass MCS.
Haba kren halor ka eksamin DSC, u la ong ba ïa ka risol jong ka eksamin District Selection Committee nangne shakhmat ha u juh u snem ba thoh eksam, yn pynbna ruh ïa ka risol, yn ym leh shuh kumba ju leh mynno mynno da kaba pynsahteng bun bun snem.
