Tennessee, Risaw:
Katkum ki khubor, la ong ba 19 ngut ki la jah rngai bad kumba katto- katne ngut ki la khlad ia kiba ym pat lah ban ai jingkheiñ thik pa thik, hadien ka jingbthei kaba jur ha ka jaka buh tiar thma jong ki shipai ka US, kaba la jia ha ka Sngi Thohdieng, bad kaba la pynlong ia ki tnat iarap na kylleng jong ka ri, ban leit her mar-mar sha katei ka jaka ban leit khyllie bad kyndang ia ki kynrum- kynram kiba la twa bad julor baroh, ban lap bad ioh sei ia kiba ngat bad kiba la sahkut ha katei ka jaka.
Katkum ki dur ba la ioh ring nalor suiñ da ki drone, kiba la pynsaphriang da ki lad pathai khubor jong ka US, ki pyni ia ki kynrum- kynram kiba la julor ha katei ka jaka buh tiar jong ki shipai US kaba don hapoh Hickman County, jong ka nongbah Tennessee, ha kaba ki kali kiba la shah ktah lang bad kiba la bthei bad kem ding, ki la pra bad julor bad sakma ha kylleng katei ka jaka.
U heh jong ka Humphreys County, u Chris Davis, ha ka step Sngi Saitjaiñ u la pynbna ba ki bor pyniaid ki la ioh jingtip ba don 19 ngut kiba dang jah rngai na katei ka jingjia bad katto- katne ngut ruh kiba la dep lap ia ka metiap hynrei ym pat lah ban pynshai ne pyntikna halor ka jingdon kiba khlad ruh ha kane ka jingjia.
Katei ka jingbthei, ka la jia ha kawei ka karkhana, kaba la pyniaid da ka Accurate Energetic Systems, kaba don ha ka thaiñ Bucksnort jong ka Hickman County, kaba la pynlong ia ki bor pyniaid ban maham ia ki paidbah, ba kin kiar na katei ka jaka, hadien ka jingsheptieng ia ki jingbthei kiba bud hadien ka sien ba nyngkong.
U Davis u la ong ba ka jingbthei ka la bam-duh lut ia baroh kawei ka iing ha katei ka jaka, ha kaba u la ong ba kane ka jingjia ka long kaba shyrkhei tam ka jing julor kaba u la ju sakhi ha ka jingim jong u.
Haba la kylli ban batai ia ka jinglong jong ka iing ha kaba la jia ka jingbthei, u Davis u la ong: “Ym don ei ei ban batai. Ka la shu jah rngai tang ha ka shi khyllipmat.”
Ym shym la lah ban tip mardor kaei kaba la pynlong ia katei ka jingbthei.
Katba ki heh sorkar ki dang wad bniah ïa katei ka jaka ban wad ïa ki dak, ki bor synshar ki la kam ïa ka jingap kaba jynjar na ka bynta ki bahaïing hasem jong kito kiba jah.
Ka Accurate Energetic Systems, ka kompeni shna tiar pynbthei kaba la seng ha u snem 1980, kam shym la jubab mardor halor ka jingkylli jong ka tnat pathai khubor AFP ban ai jingmut.
Ha u bnai ba la dep, ka sorkar US, ka la ai ia ka kontrak sha ka Accurate Energetic Systems, kaba shongdor haduh kumba $120 million, naka bynta ka “jingthied ia u TNT”, hynrei ym shym la lah ban tip kaei kaba la jia ha kum kane ka por ia katei ka shlem buh tiar thma jong ki shipai US.
