Shillong, Risaw 12
Kawei ka khynnah samla kaba dang 15 snem ka rta ka la jah na ïingsah ha ka sngi U Blei, kaba dei ka 12 tarik u Risaw, 2025, ha ka por 6:00 baje duna janmiet.
Kane ka khynnah ka dei kaba la tip kyrteng ka Bajanai Khyllep, kaba shong ba sah ha kawei na ki dong ha Umpling.
Hadien ba la jah, kiba haïing hasem bad ki nongshong shnong ki la ïa mih paidbah ban ïa wad.
Haba ïoh ban ïakren bad u kpa jong ka samla Bajanai khyllep u Bah Bikas Marbañiang u la ïathuh ba ka Bajanai ka la mut leit sha painkhana bad ka rah ïa ka borti ban leit tong um na kor um hajan surok hynrei kam shym la wan phai ïing shuh, hynrei u kpa u la ïoh tam tang ka baje ba ka hap ha lynti.
U la ïathuh ba kam shym la don kano kano ka jingmai na ïing na sem hynrei kim tip pat ïa ka daw ba ka jah na la ïing.
U la ïathuh biang hadien ba ka la slem ban wan phai sha ïing, ka kmie ka la leit wad hynrei kam shym ïohi shuh ïa ka Bajanai naduh ka por 6: baje eiei janmiet.
U la ïathuh ruh ba naduh ba jia kane ka jingjia, ki la leit ban ai da ka ejahar sha thanad Rynjah.
Ka jingjah kane ka samla lud ha Umpling ka la pynlong ïa ki paidbah kiba najan bad na jngai kiba ïohi ïa kane ka khubor ba kin ïamih paidbah ban ïarap ha ka ban ïawad ïa kane ka khynnah.
Ki paidbah naduh ki longkmie, ki samla kynthei bad shynrang kiba sah ha Umpling ki la mih ban ïeng harud surok ha ka miet jong ka sngi U Blei ban pynsangeh ïa ki kali kiba ïaid ha surok ban peit bniah ïa ki briew kiba shong hapoh kali.
La ïohi ba ki don ki longkmie kiba la ïeng harud surok ban ai da ka jingshai (torchlight) ban peit ïa ki briew kiba shong hapoh kali.
Haduh ba thoh ïa kane ka khubor ym pat lap dien satia ïa kane ka khynnah shano ka don, la ka phet hi ne hato don kiba rahbor ne kiei pat kiwei ki daw jong ka jingjah, ym pat lah ban batai eiei.
