Shillong, Risaw 12
Ki pulit jong ka nongbah Shillong kim pat lapksai ïa kiba donkti ban pynïap ïa u heprit Kyrshanbor Kharmudai hadien saw sngi ba la lap ïa ka metïap ha shnong Maw-pat ka dong Rumnong.
Ïaka metïap jong u Kyrshanbor la lap ha ka 9 tarik mynta u bnai ha ki por mynstep harud surok ha Mawpat dong Rum-nong da kiba mareh step.
Lada kheiñ naduh ba jah u heprit Kyrshanbor kaba dei ha ka 8 tarik Risaw ha ka por 4:00 baje janmiet haduh mynta ka sngi ka 12 tarik Risaw 2025 ka la long san sngi hynrei kat haduh ban da thoh ïa kane ka khubor ki pulit kim pat lapksai ïa kiba donkti.
Na ka liang ki pulit ki la leit ban tohkit ïa ki shipara kiba ïalehkai lang ha ka 8 tarik Risaw naduh ba jah na ïing hynrei haduh mynta ki pulit kim pat ïoh kem ne lapskai hynrei ki dang pynlong ïa ka jingtohkit.
Kumjuh ruh kiba haïing haduh mynta kim pat ïoh ïa ka kaiphot post mortem na NEIGRIHMS Hospital Mawdiang-diang.
Kumban shu pynkynmaw ki pulit ka nongbah Shillong ha ka sngi Saitjaiñ ki la leit sha ïingsah jong u heprit Kyrshanbor Kharmudai ha Nongrah Lum Marboh ban ïalam ïa ki saw ngut ki khun jong ka Kong Trilin Kharmudai kaba dei ka Meiheh jong u Kyrshan ban shim ïa ka jingtohkit.
Haba U Nongsaiñ Hima u la buddien biang ïa kane ka jingshah pynïap u heprit Kyrshanbor la ïoh ban ïakynduh markhmat bad ka Meiheh jong une u heprit ka Kong Trilin Kharmudai ha ïingsah ha Nongbah Lum Marboh.
Ha kane ka jingïakynduh, ka Kong Trilin Kharmudai ka la pyni ïa ka jaka ba u heprit Kyrshanbor Kharmudai u la ïalehkai khatduh bad ki khun jong ka ha shwa ba un jah.
Ka Kong Trilin Kharmudai ka la ïathuh ba haduh mynta ka sngi ki pulit kim pat ïathuh eiei lane ban batai la ki la lap ksai mano ba donkti ban pynïap ïa u heprit Kyrshanbor Kharmudai.
