Shillong, Risaw 12
Ka Diengshynrum SC ka la long ka kynhun kaba nyngkong ban ïoh rung sha ka quarter final ha ka Meghalaya Women’s State League 2025 hadien ba ka la ïoh ban bat ïa ka kyrdan ba hakhlieh ha ka Group-C ha ka sngi Saitjaiñ.
Ka Diengshynrum na East Jaiñtia Hills District Football Association bad ka Chirupheiwi Nongkyn-rih FC na Laskein Block Sports Association ki la long ki ar tylli ki kynhun kiba la don ha ka Group-C. Te kumta kine ki kynhun ki la ïakhun pyrshah ha ka dur jong ka ‘home and away’ bad tang kawei ka kynhun kaba bat ïa ka kyrdan ba hakhlieh ka ban jam sha ka quarter final. Ha ka wat kaba nyngkong ka Diengshynrum ka la lah ban pynliem ïa ka Chirupheiwi Nongkynrih da 2-0 kol kaba la long ha ka 2 tarik mynta u bnai.
Hynrei ha ka jingïalehkai ha la ïing sngi ha Khliehriat kaba la long ha ka Saitjaiñ (11 tarik) ka la lah ban pynliem da 7-0 kol. Ka Charlinda Nong-tdu (8, 43, 72 & 85) ka la thep marwei haduh saw kol, katba ïa kiwei pat la thep da ka Saphapaya Lyngdoh (12), Deimonme Lyngdoh (26) bad ka Hapily Lyngdoh (78).
Ha kawei pat ka jingïalehkai jong ka Group-A, ka Na Rympei FA ka la wanphai da ka jingjop na ka bynta ban pynliem noh ïa ka Lapa-lang SSCC da 14-0 kol. Ka Pynhun Shulet ka la khur ïa ar tylli ki hat-trick da kaba thep marwei haduh hynñiew kol (7, 18, 21, 38, 63 88 & 90), katba ïa kiwei pat la thep da ka Daai (19), Remika (22 & 42), Tracy Rympei (30), Streamlet Taro (45), Ïawanlang Nongbet (54) bad ka Wanmi Kharpan (60).
Ha ka Group-A ki la don san tylli ki kynhun, ha kaba lai tylli ki kynhun ki ban wan ha ki kyrdan ba hakhlieh kin ïoh rung sha ka quarter final. Kumba ka long mynta ka Laitkor SC, Pay For Right FA bad ka Na Rympei ki la long ki lai tylli ki kynhun kiba dangdon ha ki kyrdan ba shakhmat.
Ha ka jingïalehkai jong ka Group-B, ka Mawlum Tyrsad SC bad ka Mawten SC ki la ïasam mar shi point hadien ba kim shym la lah ban thep kol haduh kaba kut ka jingïalehkai. Katba ka Bright Future SSCC ka al jop da 4-0 kol ïa ka Mawsawrit SC. Ka Ricika Basawïawmoit (5 & 39) ka la thep ar kol, katba ïa kiwei pat la thep da ka B Thongni (50) bad ka H Nongrum (88).
Ha kane ka Group-B ki don haduh hynriew tylli ki kynhun, ha kaba ki kynhun ki ban don ha ka ‘top four’ kin ïoh rung sha ka quarter final. Kumba ka long mynta ka Mawlum Tyrsad SC, Bright Future, Mawten bad ka Young SSCC ki la don ha ka ‘top four’.
Ha ka lah sngi U Blei kan don tang kawei ka jingïalehkai jong ka Group-A ha Shillong hapdeng ka Pay For Right FA pyrshah ïa ka Attacker’s Youth Club ha ka por 10 baje mynstep.
