Nongpoh, Risaw 12
Ki pulit ka Ri Bhoi ha ka miet jong ka sngi Saitjaiñ hadien ka jingïoh jingtip ba thikna, ki la lah ban pynlip noh ïa u bom uba ba khia kumba 4.7 kilo uba la buh hakhmat ka ïingsah u Ma Nehlang Lyngdoh kaba don marjan jong ka ïew bad ka Meghalaya Rural Bank ha Umsning.
Haba kren sha ki lad pathai khubor, u Senior Superintendent of Police ka Ri Bhoi District, u Vivekanand Singh Rathore ula ïathuh ba ki pulit ki la ïoh jingtip haka por 7:30 janmiet eiei ba ka la don kawei ka pla kaba la ieh marjan bad kawei ka ïing hajan ïew Umsning.
U la ïathuh ba tang mar ïa ïoh jingtip, ka kynhun ki K9 bad Bomb Detection and Disposal Squad (BDDS) na nongbah Shillong kila wan hiar sha katei ka jaka ban pynlong ïaka jingtohkit bad hadien ka jingbud ryntih ïaki lad jingïada katkum ki rukom treikam ba kyrpang (special operating procedure), la lap ïa u bom Improvised Explosive Device (IED) uba la shna lyngba ki gelatin sticks, ryngkat ki jingpynbthei ilektrik (electric detonators).
Utei u heh pulit u la ïathuh ruh ba ïa utei u bom, la lah ban pynlip noh bad la kurup noh ïa kitei ki tiar pynbthei kiba kynthup ïa u gelatin, 10 tylli ki detonators bad kumba 50 tylli ki lyngkhot nar kiban long kum ki saphit jingpynbthei bad ka jingtohkit halor kane ka jingjia ka dang ïaid shakhmat.
Haba pyrshang wad jingtip pat hato ki pulit ki la ïohkem ne em ïa kiba donkti, utei u heh pulit u la jubab ba ym pat ïoh kem satia ïa kiba donkti, hynrei ki bor pulit ki la ïoh ksai bad shen kin sa ïoh ban kem noh ïa uba suba donkti halor kane ka kam.
