Shillong, Risaw 12
Ki pulit ka North Garo Hills kila ïoh ban kem ïa arngut ki nonglute hadien ba ka arshaka kaba ki shong, kaba dei ruh ka arshaka kaba ki tuh, kala ngat ha ka jingjia aksiden ha Berubari, kaba hap ha thanad Bajengdoba.
Kane ka jingjia aksiden ka la jia haba u Walchang K Sangma uba la ñiah ïa kane ka arshaka bad u Mikserbert Sangma ba shong hadien, kala leit ban tynrah ïa uwei u dieng ha National Highway 51. La ong ba ka jingleit tynrah ïa une u dieng ruh ka la dei namar ba kine ki ar ngut ki la don hapdeng ka jingshoh khawiang.
Haba ïoh ïa ka khubor aksiden, ka kynhun ki pulit kala hiar sha katei ka jaka bad kala lap ïa kine ki arngut hapdeng ka jingmynsaw.
Ki Pulit kila pynkit noh mar mar ïa kine ki briew sha Bajengdoba Primary Health Centre ban ai jingsumar. Ha ka jingkhmih ki doktor la shem ba kine baroh arngut kila buaid kyiad, kaba lam sha kane ka jingjia aksiden.
Ha ka jingtalasi ïa ki pla ba la rah da kine ki briew, ki Pulit kila lap pynban ïa ki tiar pynmynsaw bad kiwei ki mar.
Ki pulit mar mar kila kurup ruh ïa kine ki tiar bad kumjuh ruh ïa ka arshaka kaba don ïa u registration number ML07-B-7072.
Ki mar bala ïoh kurup ki kynthup ïa artylli ki suloi dieng, san tylli ki mobile phone, ka wait khukri bad kiwei kiwei.
Ha ka jingtohkit la lap ruh ba u Walchang u dei uba la shah kem teng halor ki kam bymman pyrshah ïa ki kynthei bad ula shong pathok haduh 7 snem. U Mikselbert ruh u dei uba donkti ha ki kam rahbor.
Kine ki arngut kila ïasuhbuit ruh ban leh ïa bun ki kam pyntriem hadien ba ki la ïakynduh paralok hapoh ka District Jail ha Tura.
Kila phla ba kila tuh ïa lai tylli ki mobile phone na kawei kabos bad ïa ka arshaka na Rongmil, East Garo Hills District.
“U Walshang ula phla ba ïa ki suloi dieng, kaba ki ïarah, la shna da ma u hi ha ka ïing jong ka Kmie Ieid kaba don ha RC Tura. Ula shna ïa kine ki suloi ban pyntieng ïa ki briew haba leh ïa ka kam bymman,” ong ki Pulit.
Ki Pulit kila register case pyrshah ïa kine ki arngut ha ki kyndon bapher bapher jong ka aiñ bad ka jingtohkit mynta kala ïaid shakhmat.
