Shillong, Risaw 12
Ka Nangkiew Irat SC ka la mad biang ïa ka jingshah rem kaba ar sa ha ka Mylliem SC da 1-0 kol ha ka lympung ïalehkai Shillong Premier League 2025 kaba la long ha ka sngi Saitjaiñ ha SSA Stadium kaba ha First Ground, Polo.
Kane ka nam jop ka la wan urlong lyngba ka shi kol ba la thep da u Alem Khongwir ha ka minit kaba 20 na ka bynta ban pynlong ïa ka Mylliem ban nangjam sha ki kyrdan ba kham shakhmat.
Kumba ka paw mar ïasdang ka aïom ïalehkai jong ka SPL ka Nangkiew Irat ka la long ka kynhun kaba khlaiñ bor ha kaba ka la khur jingjop haduh saw sien bad la ï kumba kan rah ïa ka nam lahduh.
Ha kane ka jingiakhun pyrshah ia ka Mylliem, ka Nangkiew Irat kam shim la lah ba kan don lut ïa ki rangïalehkai kiba kynsai, ha kaba don napdeng jong ki kiba shitom bad don kiba shongben namar ka jingshah sospon.
Hynrei da kane ka jingshah rem hakhmat ka Mylliem, ka la pynlong ïa ka Nangkiew ba kan kut noh ka jingangnud ban khur ïa ka nam lahduh ha kane ka kynti kaba mynta, hadien ba ka la ïai neh ha ka kyrdan ba saw bad 13 point.
Katba ka jingjop jong ka Mylliem, ka pynlong ïa ka ban khur 11 point, bad ban lait hi war na u line jong ka jingma (relegation zone).
Ki rangïalehkai ba kham paw bym shym la lah ban don ha ka thup jong ka kynhun ïalehkai ka Nangkiew ki long u Himanshu Patil, Khangmiki Pale, bad u rangapkol ba nyngkong (first goolie) u Surjay Kumar Pariyar, haba ia nujor bad ka kynhun ïalehkai ka Mylliem kaba la hiar madan da ka kynhun ïalehkai ba pura, lait noh tang u Shaibor Nongrum.
Ka kol kaba u Alem u la ïoh ban thep ha kane ka jingïakhun ka pynlong ïa u ba un kynjoh sha ka thong kum u rangïalehkai ban thep bun tylli ki kol ha kane ka lympung ryngkat lang bad u Himanshu ka Nangkiew bad u Emanbha Marbaniang ka Shillong Lajong ba la ïoh ban thep mar 6 kol, kata hadien ïa u Loving Suting ka Mawlai uba la tam shakhmat da 7 kol.
Ka jingïakhun kaba khatduh jong ka Nangkiew ha kane ka lympung ïalehkai ba tang shi kylla (single leg) kan long pyrshah ïa ka Shillong Lajong, katba ka Mylliem ka dangsah sa ïa ka Rangdajied United FC.
Ha ka lah sngi U Blei, ka jingïakhun kan long hapdeng ka Nongrim Hills SC, ka kynhun kaba la tikna ban hiar kyrdan, kan ïakhun pyrshah ïa ka kynhun kaba bat ïa ka kyrdan kaba ar, ka Shillong Lajong FC, ha ka por 4:30 nohphai sngi.
