Gaza Strip, Risaw:
U Khalil Al-Hayya, uba la shah beh shnong ha Gaza, ha ka Sngi Palei u la ong ba katei ka kynhun ka la ioh jingkular kaba skhem na ka ri America, ki Arab mediator, bad na ka Turkey ba ka thma ha Gaza ka la kut noh junom.
Ka Israel bad ka kynhun ehrang Palestine ka Hamas ki la iasoi ia ka jingiateh ha ka Sngi Palei ban sangeh ia ka jingiasiat bad ban pyllait ia ki nongshah rahbor Israel ha ka jingsiew ia ki koidi Palestine, ha ka bynta ba nyngkong jong ka jingthmu jong u President U.S.
Hapoh katei ka jingiateh, ka jingialeh kan sangeh noh, ka Israel kan weng noh shi bynta na Gaza, bad ka Hamas kan pyllait lut ia baroh ki 48ngut ki nongshah rahbor kiba dang sah kiba ka la kem ha katei ka jinghiar thma kaba la pynjur ia ka thma, kum ka jingsiew kylliang ia ki koidi kiba la bat da ka Israel. Ha White House, u Trump u la ong ba u ngeit ba kan wanrah ïa ka “jingsuk kaba neh”.
La khmih lynti ba ka Hamas kan pyllait lang ia ki 20 ngut ki nongshah rahbor kiba dang im, hadien 72 kynta ba la sdang ka jingsangeh thma.
U Hayya, uba la lait im na ka jingpyrshang jong ka Israel ban pyniap ia u bad ia kiwei pat ki nongialam jong ka Hamas ha Qatar shibnai mynshwa, u la ong ba ka jingiateh ba ka Hamas ka la soi bad ka Israel ka pynkut noh ia ka thma ha Gaza, ka plie ia ka lynti kaba kongsan bad ka Egypt, bad ka iohi ia ka jingpyllait da ka Israel ia baroh ki kynthei bad ki khynnah Palestine kiba shah set phatok.
Nalor kata, ka Israel kan pyllait ïa ki 250 ngut ki nong Palestine kiba shah set slem ha ki phatok jong ka Israel, bad kumjuh ruh sa 1,700 ngut kiwei pat kiba la shah kem naduh ba la sdang ka thma ha ka 7 tarik Lber, 2023, ong u Hayya.
