Shillong, Risaw 12
U Myntri ka tnad ka rep ka riang bad ka bha ka miat ki nongrep, u Timothy D. Shira u la pynshlur ïa ki nongrep ba kin shim kabu haba ïadei bad ka Pradhan Mantri-Dhan Dhaanya Kisan Yojana (PM-DDKY), kaba kynthup ïa ki skhim bapher-bapher ka Sorkar Pdeng ban pynbha ïa ki jinglong-jingman ka rep ka riang ha ka Jylla.
U Shira u la kren ha ka State-Level Program kaba la long ha Integrated Agricultural Training Centre, Upper Shillong, ban ïasnohktilang ha ka jingpyllait ïa ka PM-DDKY ha ka ri baroh kawei da u Myntri Rangbahduh ka ri, u Narendra Modi.
U Shira u la batai ïa ki bynta bad ki jingdonkam jong ka skhim, bad la pynlong ruh ïa ka jingïakren ban jubab ïa ki jingkylli jong ki nongrep.
Ïa kane ka prokram la pynlong ha ryngkat ka jingïasnohktilang ka tnad ka rep ka riang, Krishi Vigyan Kendra East Khasi Hills, bad ka Meghalaya Agricultural Management and Extension Institute.
Ha kane ka sngi la wan ban ïashim bynta da ki nongrep na ki C&RD Block bapher-bapher jong ka East Khasi Hills District, ha ryngkat ki ophisar na ka tnad KVK, bad ATMA.
Ïa ka ‘Live Streaming’ jong ka prokram ba kongsan ha National Academy of Agricultural Sciences, New Delhi, la pyni sha ki paidbah kiba la wan shim bynta, ha kaba u Myntri Rangbahduh u la pyllait paidbah ïa ka skhim ban ïaid sha ka India kaba lah ban shaniah ha lade bad kaba dap ba biang.
