Mairang , Risaw 12
Shi bynta ban pynkhreh na ka bynta ka 39th National Games 2027, ka Eastern West Khasi Hills District Judo Association ha ryngkat ka jingïatrei lang bad ka ophis ka District Sports Officer, WKH ha ka sngi Saitjain ka la pynlong ïa ka 1st Eastern West Khasi Hills Judo Championship ha Tirot Sing Memorial Hall Pyndengumïong, Mairang.
Ha kane ka lympung la wan shim bynta da 66 ngut ki ki nongïalehkai kynthei bad shynrang na ka bynta ban pyni ïa ki sap ïalehkai ba kyrpang jong ki ha ki kyrdan jingkhia bapher bapher.
La ïadon lang ha katei ka sngi u ADC ka Eastern West Khasi Hills District u Bah M. Diengdoh kum u kongsan ha ryngkat ka jingdonlang ruh u President ka Meghalaya Judo Association u Bah John Lyngdoh, u Sordar ka shnong Pyndengumïong u Bah Bornad Syiemïong, ki dkhot jong kitei ki ar tylli ki synjuk bad kiwei.
Ïa ka nam lahduh ha ka liang ki jingïalehkai kynhun (team), la rah da ka Nong-dom na Mawthadraishan, ba-ar ka Mairang bad ïa ka kyrdan balai la ïoh ban khur da ka Tiehnongbah.
Haba ai jingkren ha katei ka sngi, u Bah Mayborn ula ong ba ka Mairang ka dang long ka District kaba danglung bad ki dangdon bun ki jingduna, bad ha kaba ïadei bad ka National Games ka long kaba donkam bha ban pynkhreh bad ula ong ba ka donkam ka jinghikai na kiba la tbit kum ki coach ka Jylla ban ïarap bad kyrshan ïa ki samla.
Shuh shuh u la ong ruh ba ka jingïalehkai Judo ka kyntiew ruh ïa ka jingkoit jingkhiah ha ka jingim jong ki briew manla ka sngi bad nalor kata, lada ki khun samla ki lah ban leh bha ban wanrah nam ïa ka Jylla ka long ruh ka lad ïoh jam ïoh jam.
