Nongpoh, Risaw 12
Ki Pulit jong ka Ri Bhoi District ha ka sngi U Blei, kila leit ban ïalam biang ïa u samla uba la kem halor ka jingsuba donkti ban leh be-ijot bad pynïap ïa kawei ka heprit kaba dang 13 snem ka rta, ïa uba la tip kyrteng kum u Iainehskhem Kharsati, sha ka khlaw kaba la kynnoh ba utei u samla u la leh ïa katei ka kam pyntriem ha kawei ka shnong kaba dang hap hapoh ka jingkhmih jong ka thanad Umiam.
Ha kane ka sngi, nalor ka kynhun jong ki pulit hapoh ka jingïalam jong u Senior Superintendent of Police ka Ri Bhoi, u Vivekanand Singh Rathore lem bad kiwei de ki heh pulit, la sakhi ruh ïa ka jingdon ryngkat jong ka kynhun na ka Meghalaya Forensics Crime Scene Unit (MFCSU).
Kane ka jingleit ïalam biang ki pulit ïa u Iainehskhem Kharsati, ka dei tang shi sngi hadien ba la ïoh ban kem noh ïa u, ka dei ban shim biang ïa ki sakhi sabut halor kumno u la leh ïa katei ka kam pyntriem kaba la pynpar ñiangkhriat ïa ki paidbah ka thaiñ Ri Bhoi bad ka jylla hi baroh kawei.
