Nongstoiñ, Risaw 12
Ka Hynñiewtrep Integrated Territorial Organization (HITO) West Khasi Hills District kala pynpaw ïa ka jingsngewkhia kaba jur halor ki jingjia shah pynïap dusmon ïa ki khyllung khynnah hapoh ka Jylla Meghalaya kiba la ïai jia na kawei ka sngi sha kawei pat.
Haba kren ha ki lad pathai khubor halor kane ka phang, u Bah Phleming Mawlieh, President ka HITOha ryngkat ka jingdonlang u Bah Kharlessborn Nongbri General Secretary u la ong, ka donkam ka jingïatreilang naduh ka tnat pulit ki bor District bad ki paidbah ban khang lad ïa kum kine ki jingsniew kiba la pyntieng pynsmiej ïa ki paidbah jong ka Jylla hi baroh kawei.
U la ong ruh ba ka seng ka kyntu ïa ki bor jong ka aiñ khamtam ka tnat pulit ban shimkhia khnang ban lah ban pynduh ïa kum kine ki jingsniew. Ha kajuh ka por u la kyntu jur ïa ki bor pynïaid shnong, ki VDP khamtam ïa ki kmie ki kpa bad ki bor pynïaid skul ha WKH ba kin long kiba husiar khnang ba kum kine ki jingjia kin nym wan jia hapoh ka West Khasi Hills District.
U Bah Kharlessborn General Secretary ka HITO pat u la ong ba na ka liang jong ki nongsynshar Hima ki nongsynshar shnong kidei ban da phikir bha ha kaba ai NOC ne ai wai ïing ïa ki briew kiba nabar bad khlem da tip ïa ka jinglong jingman jong u lane ka briew ban lait na kino kino ki jingjia ba sniew bad kiba sngewsih.
