Washington, Risaw:
Ki arngut ki heh ophisar jong ka US ha ka Sngi Palei, ki la iathuh ba ka America kan sa phah ia 200 ngut ki shipai kum shi bynta jong ka kynhun treikam ba iatreilang na ka bynta ka jingshngaiñ jong ka Gaza, khlem da don ki nong America kiba don ha madan ha ka khyndew jong ka Palestine.
Kine ki heh sorkar haba kren ha ki nongthoh khubor khlem da kwah ban pynpaw kyrteng ialade, ki la ong ba kitei ki 200 ngut ki bor pahara, kin long ka tynrai jong ka kynhun treikam ka ban kynthup ïa ki nongmihkhmat na ki shipai jong ka Egypt, Qatar, Turkey bad lehse ruh na United Arab Emirates.
Ki heh sorkar ki la ong ba ym pat lah ban rai ia ka jaka ba thikna jong ki shipai US. Hynrei kin sa thaw ïa ka jaka synshar lang bad pynïasoh lang ïa kiwei pat ki bor pahara ki ban trei ha Gaza ban ïatreilang bad ki shipai Israel ban lait na ki jingïakynad.
“Ym don ki shipai US kiba thmu ban leit sha Gaza”, la ong uwei na ki heh sorkar.
Ki heh sorkar ki la ong ba la kyrmen ba ka jingïateh kular ha Gaza, shisien ba la pyntreikam, kan pynjem ïa ki jingeh ha ka thaiñ bad kan thaw ïa ki jinglong jingman na ka bynta ka jingïakren halor ki jingïateh kular kiba kham bha hapdeng ka Israel bad ki ri Arab.
U President jong ka America, u Donald Trump, ha ka samoi treikam ba nyngkong jong u, u la pynlong pdeng ia kaei kaba la tip kum ka Abraham Accords, kata ka jingiateh kular ban pynbeit ryntih hapdeng ka Israel bad ka Bahrain, ka United Arab Emirates, ka Morocco bad ka Sudan.
Ki heh ophisar ki la ong ba ka Saudi Arabia ka dei ka kandidet na ka bynta kum kane ka jingiateh bad ka Israel kumba long ka Indonesia, Mauritania, Algeria, Syria bad Lebanon.
