Jowai, Risaw 13
Ka Ïingkashari jong ka Special Judge (POCSO), Jowai, ka la rai pynrem ïa u Brightstarmi Nangbah katkum ki kyndon 3(a)/4 jong ka POCSO Act, 2012, halor ka jingleh be-ijot ïa kawei ka khynnah kynthei kaba dang 14 snem ka rta.
Kane ka mukotduma ka mih na ka FIR kaba la ujor ha ka 4 tarik Naiwieng, 2019, ha thanad Jowai, ha kaba la pynpaw ba une u nongshah kynnoh u la leh beijot ïa kane ka khynnah rit naduh u bnai Nailur (September) 2018 bad u la byrngem ruh ïa ka ba kan sngap jar. Ïa kane ka jingtohkit la leh da ka WP SI I. Kharpran. Hadien ba la kut ka jingbishar, ka ïingbishar ka la rai pynrem ïa u Brightstarmi Nangbah da kaba set phatok 10 snem bad ka la pynngat ïa ka kuna kaba T.20,000 bad lada um siew ïa katei ka kuna un shah set phatok sa hynriew bnai.
