Shillong, Risaw 13
U MLA ka BJP na Pynthorumkhrah bad Myntri barim ka Sorkar Jylla u Bah AL Hek u la pynpaw ïa ka jingbym sngewïahap halor ka jingdawa jong ka BJP ban weng noh mardor ïa ka Deputy Commissioner jong ka East Khasi Hills halor ka jingkynnoh ba ka la pheil ban pynthikna ïa ka jingshngaiñ jong ki khyllung khynnah.
Haba kren bad ki nongthoh khubor, u Bah Hek u la ong ba u la dep ban ïakren bad u President ka BJP bad ban pan jingpynshai halor kane ka rai, da kaba buh jingkylli ïa ka jingïadei jong ka, haba katei ka mat ka ïadei bad ka tnat pulit.
“Katkum ka jing-sngewthuh ka jong nga, ki kam runar ki dei bad hap hapoh ka tnat pulit. Nga sngew ba kam don jingmut ban dawa weng noh ïa ka Deputy Commissioner,” u la ong.
U Bah AL Hek uba don mynta ha Delhi, u la pynpaw ba um pat sngewthuh bha ïa ka mat kaba don shadien jong katei ka jingdawa bad u la pynpaw ïa ka jinglyngngoh ba ka seng kam shym la pyntip ne pan jingmut na u shwa ban buh ïa kum kane ka jingdawa.
