Jowai, Risaw 13
Ka Dorbar Elaka Shilliangmyntang kala dawa na ki bor pynïaid District jong ka West Jaiñtia Hills ban pynbiang ïa ki bor pahara kiba khlaiñ na ka bynta ban ai jingïada ha ka jingot kba jong ki nongshong shnong ka Lapangap shwa ka 15 tarik mynta u bnai.
Ka Dorbar Elaka Shilliangmyntang ka la dawa ïa kane lyngba ka jingaiti da ka jingthoh ha u Deputy Commissioner jong ka West Jaiñtia Hills, ha u Superinten-dent of Police bad ha u CEM jong ka Jaiñtia Hills Autonomous Dis-trict Council (JHADC) ha ka 13 tarik mynta u bnai. Ha kane ka jingleit aiti jingthoh la donlang ruh u MDC ka thaiñ, Bah Daemi Liam, u Dolloi ka Elaka Shilliangmyntang nalor kiwei-kiwei ki dkhot nongkitkam ka Elaka.
U Dolloi ka Elaka Shilliangmyntang u Bah K Sariang u la ong, ka por kaba mynta ka long kaba kongsan bha ban ot ïa u kba na ki lyngkha kba, hynrei ka jingma ïa ka jingshngaiñ jong ki nongshong shnong ka la pynlong ïa ki ban shem jingeh ban ïaid shakhmat ïa ka jingot kba.
U Assistant Secretary Elaka Shilliangmyntang u Bah Shiborlang Lamare u la pyntip ba ki nongshong shnong jong ka Lapangap kila pynkhreh ban ot biang ïa u kba ha ka 16 bad 17 tarik mynta u bnai bad lada ka Sorkar kam lah ban pynbiang ïa ki lad jingïada, ki la maham ba ki nongshong shnong jong ka Elaka Shilliangmyntang ryngkat bad ki nongshong shnong jong ka Lapangap kim banse ban shim ïa ki lad jingïada kiba donkam, kynthup ban rah ïa ki tiar ïaleh kiba don laisen, ban ïada ïalade bad ïa ki jingthung jingtep bad kino-kino ki jingma kiba lah ban jia, bad ha kaba ka Sorkar kan hap ban shim ïa ka jingkitkhlieh.
