Shillong, Risaw 13
Ka Bharatiya Janata Party (BJP) Meghalaya, kala dawa ban weng noh mardor ïa ka Kong RM Kurbah kaba dei ka Deputy Commissioner jong ka East Khasi Hills, da kaba kdew ïa ka jingbymlah jong ka bor synshar district ban tehlakam ïa ka jingkiew jong ki kam runar pyrshah ïa ki khyllung khynnah.
U General Secretary ka BJP, Bah Wankitbok Pohshna haba kren bad ki nongthoh khubor u la ong, ka District kam don shuh ïa ka shongsuk shongsaiñ, ka jingshah pynïap klep ki khyllung khynnah kiba la jia khah-khah ha kine ki bnai.
U Bah Pohshna u la ong, ka long kaba sngewlyngngoh ngaiñ ba wat hadien ka jingjia ïa i heprit Insaphira Lyngdoh Mawnai kam shym la don kano-kano ka sienjam ba la shim da ki nongpynïaid district ban wanrah ïa ka shongsuk shong shngaiñ ha ka district pynban la wan poi sa kawei ka apot ha kaba u heprit Kyrshanborlang Kharmudai u la duh ei ïa la ka jingim bad ym pat shym la lap sabut eiei.
Ka long kaba sngewphylla ba kat ka khlieh jong ka district kam shym la shimkhia ban lum ïa ki nongkitkam shnong ne ban khot jingïalang ne ban pynjari da ka jingpahara miet ha ki jaka kyndong ban tehlakam ïa ki kam sniew kiba jia khamtam ha ki por shiteng synñia.
U la bynrap da kaba ong, ka jingleh bym suidñiew jong ki nongpynïaid distrik ka pynlong ïa ki riew shim kabu ban pyndonkam ïa kitei ki jaka paidbah ban leh ki kam sniew khlem jingsalia shuh ïa ka aiñ bad kum ka BJP ka la sngewdei ba ka Sorkar kan shimkhia ban weng mardor ïa ka DC bad wanrah noh da ki ophisar kiba lah ban trei na ka bynta ka jingshongsuk shong shngaiñ.
U la pynpaw ïa ka jingsngewkhia kaba jur halor ka jingnang kiew ki jingjia pyntriem, haba pynpaw ba ki bor District kim shym la lah ban trei bha ïa la ka kamram.
“Ka bor district kam dei ban donkam ïa ngi ba ngin pynkynmaw ïa ki ïa ka kamram jong ki ne ban batai ïa ki kumno ban pyndep ïa ka kamram jong ki. Ki ophisar kiba don ka jingkitkhlieh ki donkam ban pyndonkam ïa la ka jong ka bor khlem da kheiñ ïa kano-kano ka jingpynbor. Lada kam jia kumta, ka Sorkar ka dei ban weng noh mardor ïa kum kine ki ophisar ki bym lah ban pynïaid ïa ka bor synshar distrik bad bujli ïa ki da ki briew ba lah bad ba don ka jingkitkhlieh,” u la ong.
U Bah Wankitbok u la kynnoh ba kam don satia ka jingshim ïa ki lad ki lynti kiba biang da ka bor synshar district ban ïada ïa kum kine ki kam runar, kynthup ïa ka jingduna ban don ki pulit, ka jingbym don ka jingpahara ba man ka por, bad ka jingbym don ka jingpahara miet kaba la pynbeit ryntih.
U la ban jur ïa ka jingdonkam ban pynkhlaiñ ïa ki lad jingïada, kum ka jingpeitngor baroh shisngi ïa ki jaka rung bad jaka mih, ka jingbuh ïa ki Village Defense Party (VDP) bad ki pulit, bad ka jingpyn ïadon bynta lang ïa ki nongtrei mon sngewbha na ka thaiñ ban pynthikna ïa ka jingshngaiñ jong ki khynnah.
Utei u nongïalam ka BJP u la kynthoh jur ïa ka bor synshar ba ka leh smat leh sting tang ha ki prokram ba kyrpang, kum ka tamasa Cherry Blossom ne ki jingïalehkai phutbol, katba ka iehnoh ïa ki mat kiba kongsan kum ka jingdih kyiad ha ka por miet bad ka jingdih drok ha ki bynta bapher-bapher jong ka nongbah Shillong.
U la kyntu ïa ka Sorkar ba ka dei ban pan jingïarap na ka Home Ministry ka Sorkar Pdeng bad ki riew shemphang ban lap bad weng ïa ki daw tynrai jong kine ki kam sniew.
