Shillong, Risaw 13
Ka Meghalaya Pradesh Congress Committee ka la dawa na ka Sorkar, ba ka dei ban pynphai biang ïa ka jingpynkylla ïa ka aiñ Right to Information (RTI) ha u snem 2019 namar ba kane ka jingpynkylla ka khanglad ïa ka bor jong ka Central Information Commission (CIC) bad ka State Information Commission (SIC).
Ka Congress ka la kyntu ruh ïa ka Sorkar ban pynkylla noh ïa ka Digital Personal Data Protection Act (DPDP) 2023 da kaba ong ba ka la pyndonkam bakla bad pynkheiñ ïa ka aiñ RTI.
Haba kren sha ki nongthoh khubor ha ka sngi nyngkong u Bah Manuel Badwar, Secre-tary jong ka Meghalaya Pradesh Congress Com-mittee (MPCC) u la pynpaw ïa ka jingsngewkhia halor ka jingpynsniew dur ïa ka aiñ Right to Information (RTI) Act, 2005, hapdeng ka jingdap 20 snem ka jingpynlong aiñ ïa ka.
U la kynnoh ïa ka Sorkar BJP kaba la pyrshang ban pynduh bor ïa ka aiñ RTI lyngba ki jingpynkylla bad ki aiñ kiba thymmai.
U Bah Manuel u la kynnoh ba ka jingpynkylla ïa ka RTI ha u snem 2019 ka la pynduh noh ïa ka jinglong laitluid jong ka State Information Commission bad ka Central Information Commission.
U la kdew ruh ba ka Digital Personal Data Protection Act, 2023, ka lah ban shah pyndonkam bakla ban buhrieh ïa ki jingtip sha ki nongwad RTI, da kaba ai nuksa ïa ki skhim MLA bad ka jingpynlut ïa ka pisa paidbah.
U la ong ba ki dawa na ka Sorkar ban pynphai biang ïa ka jingpynkylla ha u snem 2019, ban pynkylla ïa ka Digital Personal Data Protection Act, 2023 bad ban pyndap ïa ki kam ba lait ha ka State Information Commission bad Central Information Commission ha ka por kaba biang.
U Bah Manuel u la pynpaw ka jingsngewkhia halor ka jingshngaiñ ki nongwad RTI lane ki Social activist, da kaba kdew ba ha Meghalaya kam pat don kane ka jingjia ïa ki nongwad RTI hynrei la ïohi pat ba ha kiwei ki Jylla ki ïakynduh jingeh ha ka jingim jong ki.
U nongïalam ka Youth Congress, u samla Banphira Basaiawmoit, u la pynpaw ïa ki juh ki jingsngewkhia, da kaba ong ba ka aiñ ïada ïa ka Digital Personal Data Protection Act, 2023 ka lah ban pynsniewdur noh ïa ka aiñ RTI bad ai bor ïa ka Sorkar ban ïada ïalade.
