Shillong, Risaw 13
Ka Phoebe Dale Nongrum ka la thaw ïa ka khana kum ka kynthei ba nyngkong eh ban khur jingjop ha ka jingïakop ñiah kali jong ka 5th Rally of Himalayas Manali ha ka 12 tarik mynta u bnai da kaba la wan ha ka kyrdan balai.
Ha kane ka jingïakop, ka Phoebe Dale Nongrum ryngkat bad u Venu u paralok nongñiah kali lang ki la ïoh ban khur ïa katei ka jingjop ha ka T1 Xtreme Category bad ka la long ka kynthei kaba nyngkong eh na ka thaiñ shatei lammihngi ban ïoh ïa katei ka nam jop.
Ïa ka nam lahduh ha kane ka T1 Xtreme Category, la rah da ka Araya Rana bad ba-ar ka Lakhpa na Arunachal Pradesh.
Katei ka kynhun jong ka Phoebe ka la ïoh ruh ïa ka khusnam “Best Team” hadien ba la ïoh ka jingithuh halor ka jingtbit ha kane ka jingïakop ñiah kali.
Ka Rally of Himalayas ka dei ka jingïakop ñiah kali kaba paw ba la pynlong da ka Himalayan Xtreme Motorsports bad kaba la mynjur da ka Motor Sports Club of India (FMSCI).
Kane ka jingïakop mynta u snem la ong ba ka long kaba kham eh bad kito ki jaka kiba kham long riat jong ki bynta u lum Himalaya ha kaba la sdang na Manali ter ter sha Gramphu, Bathal, Jispa, Darcha, bad Shinku La Pass.
