Jowai, Risaw 13
Khliehtyrshi SC bad Larnai SC ki la khur jingjop ha ka lympung ïalehkai 1st Division Football Tour-nament ba la pynïaid da ka Thadlaskeiñ Sports Association (TSA) ha ka lah sngi U Blei ha Multi Complex Sports, Wahïajer.
Ha ka jingïalehkai kaba nyngkong, ka Khliehtyrshi ka la pynliem noh ïa ka Modymmai SC da 3-1. U Khrawkupar Kharsyntiew u la thep ar kol ha ka minit kaba 29 & 55 bad ïa kawei pat la thep da u Helpmi Shylla (66). Hynrei ka Modymmai ka la pynphai kylla shi kol lyngba u Wankit Pakma (40).
Haba phai sha kawei pat ka jingïakhun, ka Larnai SC ka la pynliem noh ïa ka The A team lyngba ka shi kol ba la thep da u Enforceme Kharsohnoh ha ka minit kaba 35.
Ka jingïalehkai ha ka sngi Ba-ar kan long hapdeng ka Evergreen SC pyrshah ïa ka Wahshangiar SC ha ka por 12:30 mynsngi, katba ka Jalapang SC ïa ka Nongkhroh Mawsiang SC ha ka por 2:30 nohphai sngi.
