Shillong, Risaw 13
Hadien ka jinglap noh ïa ka khynnah kynthei kaba la jah na ka shnong Umpling ha ka step synñia jong ka 13 tarik u Risaw 2025, kaba la tip kyrteng ka Bajanai Khyllep, ba dang 17 snem ka rta, na ka liang u Superintendent of Police (SP), East Khasi Hills District, u Bah Vivek Syiem u la ïathuh ba kane ka dei ka kam shi samla.
Kane ka khynnah kynthei kadei kaba la jah na la ïing ha ka 12 tarik Risaw, 2025 naduh ka por 6 baje janmiet bad ha ka jingïawad shnong ryngkat ki bor pulit la lap noh ïa katei ka khynnah ba ka don lang bad u wei u samla shynrang.
Haba pyntip ïa kane sha ki lad pathai khubor ha ka janmiet jong ka 13 tarik u Risaw 2025, u Bah Vivek u la ïathuh ba kine ki arngut ki la don ka jingïadei samla mynta la kumba ar taïew eiei bad kane ka khynnah ka la mih hi na la ïng ban leit ïa kynduh ïa u.
U Bah Vivek u la ïathuh ruh ba u ne u khynnah ba ïalam ïa katei ka khynnah u dei uba la heh ka rta bad la lap ïa ki na ka ïingsah jong u, kaba don ha Umpling hi.
U la ong ba la buh ïa ka mukotduma halor ka jingjah ka Bajanai bad la lap noh ïa ka ha ka step synñia jong ka 13 tarik, ba ka don lang bad u wei u samla shynrang uba la don ruh ha ka rta ba la kham heh bad la buh ha ki kyndon jong ka aiñ.
U la ïathuh ruh ba ïa u tei u samla la rah sha Kashari ban tian bishar ïa u, katba ïa katei ka khynnah pat la ïalam sha ka jaka ai jingsumar ban leh ïa ka medical check-up bad mynta la aiti noh sha ki bahaïing hasem ha Umpling,” la ong u Bah Vivek.
U Bah Vivek u la ïathuh ruh ba ki pulit ki la tian bishar ïa u ne u samla katei ka khynnah ha Ïing Kashari bad la dep ban pynngat ruh hapoh ki kyndon rahbor bad set jubor.
Haba kylli u Bah Vivek u la ong “Nyngkong ngin hap peit shwa ban pynshisha ïa ka jingshah rahbor bad set jubor bad une u samla katei ka khynnah u lah ban ngat ruh ha ka jingshah set patok kaba long lai snem haduh hynñiew snem.” Halor ka jingïai jia ka jingjah ki khynnah samla, u Bah Vivek u la kyrpad ïa ki kmie ki kpa ba kin ïakren bad kin ïajan bha bad ki khun, bad ban sngewthuh ba ki khun ki ïa don jingïadei badno lyngba ki social media bad badno ki ïa phone, da kaba bynrap ruh ba bunsien ki khun ki kham tip ban ïa ki kmie ki kpa. “Hooid ki kmie ki kpa kim nang ban pyndonkam ïa ki social media, hynrei ki kmie ki kpa ki long pat ka jingstad ban peitngor ïa la ki khun,” u la bynrap.
U SP u la kyntu ruh ïa ki paidbah kiba buh ïa ki kor CCTV ba ki dei ban buh ruh ha khmat ka khyrdop kaba phai sha surok , da kaba ong ba bunsien hi u riewsniew u wan na shabar ka khyrdop, ym na kyrpong ka ïing.
U la ïathuh ruh ba ki pulit ki la rai ba baroh ki Guest House , ki hotel, la phah ban buh ïa ki kor CCTV hakhmat ki khyrdop kaba phai sha ki surok , namar lada ym don ïa ki jingsakhi kan long kaba jynjar ban lap ksai ïa ki riew sniew.
