Shillong, Risaw 13
U Myntri Rangbah ka Jylla, u Conrad K. Sangma u la pynbna ba ka kam haba ïadei bad ka jingshimti ïa ki skul SSA bad ka jingpyntreikam ïa ka rukom siew tulop na ka bynta palat 14 hajar ngut ki nonghikai SSA ka la don ha ki kylla ba khatduh.
Ïa kane la pyntip da u President ka Meghalaya SSA Schools Association (MSSASA), Bah Aristotle C. Rymbai hadien ka jingïakynduh bad u Sangma ha ka Lah Sngi U Blei.
“Ka jingïalang ka long kaba seisoh shi kat dei. U Myntri Rangbah u la pyntip sha ka seng ba ki kam ba ïadei bad ki kot ki sla halor ki mat ba dang sahteng jong ki nonghikai SSA kiba ïadei bad ka jingshimti ïa ki skul SSA…bad ha kaba ïadei bad ka jingpyntreikam ïa ka rukom siew tulop na bynta ki nonghikai SSA ka la don ha ki kylla ba khatduh,” la ong u Bah Rymbai ha ki nongthoh khubor.
U la pyntip ba ka jingïalang buddien la buh ban long ha ka Sngi Palei, ha kaba u Myntri Rangbah ka Jylla, Myntri ka tnad pule-puthi, Bah Lahkmen Rymbui, lem bad ki ophisar na ka tnad pule-puthi kin sa nang ïakren shuh-shuh halor kine ki mat.
“Ha ka Sngi Palei (16 tarik Risaw), kan don ka jingïalang ban pynïaid da u Myntri Rangbah ka Jylla…baroh yn sa rah ha ka jingïalang,” la ong u Bah Rymbai haba bynrap ba ka seng ka la rai ban ap ïa ka jingmih na ka jingïalang.
Kaba kham kongsan ka long ba palat 3,332 tylli ki skul SSA ha Meghalaya (na ki 5,131 tylli), ki la aiti ïa ki ‘No Objection Certificate’ (NOC) ban aiti ïa ka jingpynïaid ïa ki skul jong ki sha ka Sorkar Jylla. Na kine, ki don 298 tylli ki skul SSA ba la pynïaid da ki Balang bad ‘riew shimet.
