Shillong, Risaw 13
U Bah Adelbert Nongrum MLA ka North Shillong Constituency u la ujor ha u Symbud Myntri Rangbah ka Jylla u ba khmih ïa ka tnad Transport, u Bah Sniawbhalang Dhar halor ka jingdon ki kompeni ba kamai khlem ‘licence’ kum ki ‘Aggregator’ ban pyniaid ïa ki arshaka kaba long be-aiñ bad ka jingpynslem ka Sorkar ban ai jingbit ïa ka JETS 24×7 ban kamai arshaka.
U Bah Adelbert haba kren sha ki nongthoh khubor u la ong, ka JETS 24×7 ka khlem pyrshah ïa kiba kamai arshaka, hynrei ka pyrshah ïa ka jingdon ki kompeni ba pynïaid khlem ‘licence’ bad ka jingujor ka JETS 24×7 ka long kaba dei eh, namar ba ka la ïoh ‘licence’ naduh u snem 2023 ban pynïaid ïa ka jingkamai arshaka.
U Bah Adelbert u la ong kum u nongïalam paidbah, u sngewkhia ïa ka jingbym leh eiei ka Sorkar ïa ki kompeni khlem ‘licence’ ba pynïaid ïa ki arshaka ban kamai kaba long be-aiñ katkum ka Meghalaya Taxi Aggregator Operational Rules 2020.
U la ong ba ka JETS 24×7 ka la leit ban ujor ïa kane ka kam ha u Bah Sniawbhalang Dhar, ha u Commissioner of Transport, ha u Chief Secretary barim, ha u DTO ka East Khasi Hills District bad ha u Commissioner Secretary u Sanjay Goyal, hynrei haduh mynta kine ki shu sngap khlem jubab eiei ïa kane ka jingdawa jong ki.
U Bah Adelbert u la ong, ka JETS 24×7 ka la pynbiang ïa baroh ki jingdonkam kumba la bthah, katba haduh mynta ka Sorkar ka khlem ai jingmynjur ba kin sdang kamai bad ka JETS 24×7 ka la ap palat 11 bnai ïa ka jingmynjur bad u la ong ba kane ka jingleh ka tnat Transport ka long ka ym lah ban pdiang.
U Bah Adelbert u la ong ba ka tnat kam suidniew ïa ka jingleh ki kompeni ba khlem ‘licence’ kiba la pynkheiñ ïa ka Meghalaya Taxi Aggregator Operational Rules 2020 bad ong, “Balei ka tnat ka ailad ïa kum kine ki jingpynkheiñ kyndon, katba ka ïaleh ban pynslem ban ai ka jingmynjur ïa ka kompeni trai Ri bad kane kan pynshlur ïa ki kam be-aiñ kaba wanrah jingbym shngaiñ ïa ki nongleit nongwan”
Shuh-shuh u la bynrap ba kane ka jingleh ka Sorkar ka pynduh mynsiem ïa ka sengkam sengjam ki khun samla kaba pynlong ruh ïa ki samla ban bakla lynti noh namar ka jingkyrduh kam kyrduh jam namar ki la shaniah ha kane ka kam.
U Bah Adelbert u la ban jur ba ka Sorkar ka dei ban kyntiew bad ai jingkyrshan ïa ki samla ki ba pyrshang ban seng ki kam lajong, ym ban pynduh mynsiem da kaba pynslem ban shim rai, u kwah ban ïohi ïa ka jingshimkhia ba mardor jong ka Sorkar na ka bynta ka jingbha jong ki khun samla.
