Washington, Risaw:
U President ka US, u Donald Trump ha ka Sngi U Blei u la ong ba ka America ka kwah ban ïarap ïa ka China, ym ban pynshitom ïa ka, da kaba wanrah ïa ka sur pynïasuk katto katne sngi hadien ba u la byrngem ban kyntiew ïa ka khajna kaba 100% halor ka ri kaba ar ha ka ïoh- ka kot ha ka pyrthei.
Ki jingkren jong u Trump ha ki khyndiat sngi ba la leit bad kumjuh ruh ka jingbyrngem jong u ban pynsangeh noh ïa ka jingïakynduh bad u Xi ha kaba kut jong une u bnai, ki la phah ïa ki stock jong ka Wall Street ban hiar sha ka jaka kaba sniew namar ba ki nongkhaïi ki sngewkhia ba ka thma khaïi hapdeng ka United States bad ka China ka lah ban khie biang.
“Ka USA ka kwah ban ïarap ïa ka China, ym ban pyn jynjar ïa ka!!!” U Trump u la ong ha ka jingkren jong u ha ka rynsan ‘Truth Social’, da kaba bynrap ba “U President ka China- Xi Jinping ba don burom, um kwah ïa ka jingduh jingkyrmen naka bynta ka ri jong u.”
U Trump ha ka Sngi Thohdieng, u la ong ba un pynjari ïa ki khajna ba kham heh naduh ka 1 tarik u Naiwieng kum ka jingkynthoh ïa kaei kaba u la khot ïa ka jingkhang thymmai jong ka China ïa ka jingshalan mar shabar ri kaba long “kaba shyrkhei haduh katta” halor ka karkhana shna marpoh khyndew.
Ka China, ha kajuh ka por, ka la kynnoh ïa ka United States, ba ka la leh khlem akor, ha kaba ka tnat khaïi- pateng jongka, ha ka Sngi U Blei, ka la khot ïa ka jingbyrngem jong u Trump, kum ka “nuksa ba pawnam jong ka jinglong arliang mamla.”
Ka tnat ka la ong ba ka United States ka la pynjur ïa ki lad jingïada ha ka liang ka ioh ka kot pyrshah ïa ka China naduh u bnai Nailur.
Ki mar jong ka China mynta ki ïakynduh ïa ka khajna jong ka US kaba 30% hapoh ki khajna ba la buh da u Trump katba u dang kynnoh ïa ka China ba ka ïarap ha ka khaïi pateng fentanyl bad kumjuh ruh ïa ki rukom khaïi bym hok.
Ka jingsiew kylliang jong ka China ruh ïa ka US ban buh khajna ïa ki mar khaïi jong ka US, ka dang neh hi ïa ka 10%.
Ki marpoh khyndew kiba duna bha ki long ka jingeh kaba khraw ha ka jingïakren khaïi- pateng kaba dang shen hapdeng kine ki ar tylli ki ri kiba khlaiñ bor.
Ki long kiba kongsan bha ban shna ïa kiei kiei baroh naduh ki smartphone bad ki kali ilektrik haduh ki tiar shipai bad ki tiar pynthymmai hynrei la pynmih bad pyntreikam ïa ki la jan baroh da ka China.
