Shillong, Risaw 13
Ka Hynñiewtrep National Liberation Council (HNLC) ka seng kieng atiar kaba la shah kheiñ beaiñ, ka la shim ïa ka jingkitkhlieh halor ka jingleit buh bom hakhmat ïing jong u Ma Nehlang Lyngdoh bad thmu pynbthei bom Improvised Explosive Device (IED) ha ïew Umsning, Ri-Bhoi District.
Ha ka kyrwoh ba la pyllait da u General Secretary ka HNLC Bah Sainkupar Nongtraw ha ka sngi Nyngkong u la ong, kane ka kam ka dei kaba leh kum ka “dak ka jingpyrshah” pyrshah ïa ka jingïai bteng ban shet kylla ïa ka jaidbynriew da ki riew saiñpyrthei bamsap bad ki nongkhaïi hehspah kiba ai jaka sah bad pynkupbor ïa ki bar jylla ha ka jingduhnong ki briew.
Ka HNLC ka la kynnoh ruh ïa ki riew saiñ pyrthei kiba ai jaka sah ïa ki bar jylla, pynsuk ïa ka jingdie jaka bad kyrshan ïa ka bha ka miat ki briew ba nabar bad buh jingma pat ïa ka lawei jong ka hynñiewtrep.
“Ngi pynmih ïa kane ka kyrwoh ban pynkynmaw ïa baroh ki Nongmihkhmat paidbah ba mynta bad kiba rim ba ka jingshaniah jong ka jaidbynriew kam dei ka kabu ban ïadie ne khaïi. Ka kamram jong man ki nongïalam ka long ban ïada ïa ka khyndew ka shyiap, ka spah mariang, bad ka snap kyrteng ki briew jong ngi ym ban ïapeiñ ïa ki na ka bynta ka myntoi shimet ne myntoi saiñ pyrthei,” ong u Bah Sainkupar.
“Ngi la peit bniah da ka jingsngewkhia kaba jur ba ki katto katne ki briew hapoh ka kam saiñ pyrthei ki dang ïai bteng ban pyndonkam bakla ïa ka kyrdan jong ki da kaba ai jaka sah ïa ki nongshong shnong ki bym dei ki riewlum, pynsuk ïa ka jingpynkylla jaka, bad kyrshan ïa ki jingmyntoi nabar kiba buh jingma ïa ka lawei jong u hynñiewtrep,” u la bynrap.
U la ong, “Ka jaidbynriew kala ïakynduh ïa ka jingma kaba khraw bad ba dang ïai bteng, ki riew saiñ pyrthei bamsap kiba die ïa ka khyndew ka shyiap jong ngi, ki marpoh khyndew, bad ka jinglong kyrpang jong ngi na ka bynta ka jingkyrshan nabar. Kum kine ki jingshet kylla kim dei satia tang ba ki pheil hynrei ki dei ki kam shet shukor pyrshah ïa ki briew bad ki kpa tymmen jong ngi”.
Ka HNLC ka la maham ba kan sa thad madan bad ïaleh pyrshah ïa kito kiba ïasuhbuit bad ki bar jylla, haba pynpaw ba ka bor synshar khadar ka dei ban suhthied ha ka mon jong ki paidbah, ym na ka bynta ban ïarap ïa ki briew ba nabar.
Kane ka seng kala kam ruh ba ka don ïa ki bor shipai kaba lah ban ïaleh pyrshah ïa ki riewsaiñ pyrthei ba arsap, kam pher la ki dei kiba bat ïa ka bor ne ym bat.
