Shillong, Risaw 13
Katto-katne ngut ki briew ki la shah kem noh hadien ba la lap ïa bun bah ki dawai pynbuaid ha ki ar tylli ki jingkhynra ba la pynlong da ka Anti-Narcotics Task Force (ANTF) jong ka West Garo Hills District.
Ha ka jingkhynra kaba nyngkong, ki pulit ka ANTF ki la buh ïa ka ‘naka’ ban peitngor ha Tebronggre, Soil Compound Area, da kaba pynshong nongrim katkum ki jingtip kiba tikna shaphang ki arngut kiba suba donkti ha ka ban pynkit ïa kitei ki dawai pynbuaid na Phulbari sha Tura.
Ha kane ka jingkhynra, arngut ki briew, u Johnsbirth R. Marak bad u Chayang Ch. Marak, ki la shah bat bad la talasi ïa ki, kaba la ïalam pat sha ka jinglap ïa 2,873 tylli ki dawai kuli ‘Senspa+’ kiba khia 1,106.105 ‘gram’ bad 7 tylli ki dawai kuli ‘Senspa+’ kiba khia 2.095 ‘gram’, ong u heh pulit ka distrik, u Abraham T. Sangma ha ka Lah Sngi U Blei.
Ha kawei pat ka jingkhynra ha ka 11 tarik u Risaw, ki pulit ANTF ki la pynlong ka jingkhynra ïa ka ïingsah jong u Rakizul Sheikh ha ka shnong Patharkata, ha kaba la ïoh ban kurup ïa 122 tylli ki dawai kuli rong saw, 10 bilor ka dawai jyrhoh ‘Tuscorex’, bad 6,022 tylli ki dawai kuli ‘Syndex Plus’.
Haba ïadei bad kane, la pynngat mukotduma katkum ka aiñ NDPS, bad ka jingtohkit kaba bniah ka dang ïaid shakhmat, u la ong.
Na ka liang u SP ka West Garo Hills u la kyntu ruh ïa ki paidbah ban long kiba husiar bad pyntip halor kino-kino ki kam kiba i-shankhmat haba ïadei bad ka jingkhaïi ne jingdih drok sha ka thanad lane ‘Control Room’ kaba jan eh.
