Shillong, Risaw 13
Ka ‘thei ïalehkai ka Jylla ka Larisha Kurbah ka la khur ïa ka takma rnong ha ka Open Selection Trial ba la pynïaid da ka Sports Authority of India (SAI) hapoh katei ka shlem ai jinghikai kaba don ha NEHU, Shillong.
Ïa kane jingpyrshang la sdang naduh 12 tarik bad kan kut ha ka 14 tarik mynta u bnai bad ka jingthmu ka long ban jied ïa ki nongïalehkai kiba kynsai ki ban ïoh rung hapoh ka kynhun ïalehkai ka ri India na ka bynta ki lympung ïalehkai shabar ri.
Ha kane ka jingpyrshang la wan shim bynta da ki nongïalehkai na kylleng ki jylla jong ka ri. Te kumta ha ka sngi ka sngi la pynlong shwa ïa ka Kata bad ka Kumite ba para marwei jong ki shynrang bad kynthei.
Te kumta ka Larisha ka la khur ïa katei ka takma ha ka Kumite -55kg jong ki kynthei, katba ïa ka takma ksiar la ïoh da ka Alisha (Haryana) bad takma rupa ka Gauri Pathak (CRPF). Ha ka Kumite -50 kg la jop da ka Tejasvi Narendra Walanj, takma rupa ka Chauhan Arpana (Assam Rifles) bad takma rnong ka Yami Gyadi (Nagaland).
Ha ka Kata Individual (Female Senior) la jop da ka Priyanka Rami (Guja-rat), ba-ar ka Deepanjali Karmakar (West Bengal) bad balai ka Vanshika Tanwar (Assam Rifles).
Haba phai sha ka liang ki shynrang (senior) jong ka Kata, u Arka Banerjee (Andhra Pradesh) u la khur ïa ka takma ksiar, ïa ka takma rupa bad rnong la ïoh da u Jagruth (Madhya Pradesh) bad u Hemphu Bongjang (Assam).
Ha ka Kumite -67 kg la jop da u Sharma Pranay (Delhi), ba-ar u Gajesh Kumar (Haryana) bad balai u Deepak Routhan (Madhya Pradesh). Ha ka Kumite -75 kg la jop da u Nishad Ali (Assam), ba-ar u Rajkumar (Assam Rifles) bad balai u Manish (Services Karate Team).
Ïa kiwei pat ki jingïakop jong ki shynrang bad kynthei yn bteng biang ha ka sngi Ba-ar.
