Shillong, Risaw 13
U Superintendent of Police ka East Khasi Hills District, u Bah Vivek Syiem u la pyntip ba haduh mynta ka Special Investigation Team (SIT) ka dang ap ïa ka kaiphod ‘post mortem’ halor ka jingkhlad jong u heprit Kyrshanbor Kharmudai, ba dang 7 snem ka rta, na ka shnong Nongrah Lummarboh.
Haba kren sha ki lad pathai khubor ha ka sngi Nyngkong jong ka taïew, u Bah Vivek u la ïathuh ba ki don ki dak mong ha ka met jong u heprit Kyrshanbor hynrei ym pat tip la kidei ki dak mong ba la don lypa ne kumno, hynrei ka kaiphod ‘post mortem’ kan sa batai ban lap ïa ki dak mong u khynnah.
U heprit Kyrshanbor u la jah na la ïing ha ka janmiet jong ka 08 tarik u Risaw 2025 bad ha ka jingïawad shnong bad ka jingwad na ka liang ki bor pulit, la lap noh ïa ka metïap jong u ha ka sngi ba bud, ka 09 tarik u Risaw 2025, na khlaw Mawpat.
U Bah Vivek u la ong “Mynta ka jingtohkit ka la ïaid shaid-shaid, bad ngin dang ap ïa ka kaiphod ‘post mortem’ ban shai halor ka jingkhlad u ne u khynnah”.
U Bah Vivek u la ïathuh ruh ba ki don ki dak mong ha ka met jong u heprit Kyrshanbor kiba la don lypa shwa ban leh ïa ka ‘post mortem’ bad ki don ruh katto katne ki dak mong ba leh ïa ka ‘post mortem’.
Halor kane ka jingkhlad u heprit, u Bah Vivek u la ong ba ym pat shym la tip ïa ka daw bad ki bor pulit ki dang ïa wad ïa ki daw bapher-bapher, ba kynthup ka jingdawa pisa, ka jingleh khlem akor nalor kiwei-kiwei de ki daw.
Haba ïadei pat bad ka jingsuba ba kane kadei ka kam ‘Menshohnoh’ u Bah Vivek u la ong ba ha kiba bun hi ki jingjia ba kum kine, ka dei beit ka jingïa buh jingshun, ka jingbishni lane ban pynhiar kput.
