Nongpoh, Risaw 13
Ka Synjuk ki Rangbah Shnong (SKRS) Byrni-hat Area da ka mynsiem jong ka jingsngew sarong ha ka sngi Nyngkong kala pynlong ïa ka prokram ban pynkup burom ïa u MLA bad MDC ka Jirang konstitwensi halor ka jingshah thung ka jong u kum u Myntri Sorkar ka Jylla uba dei khmih ïa ka tnat Community and Rural Development, General Administration bad ka Secretariat Administration.
Ïa kane ka prokram kaba la pynlong ha IB Byrnihat la sakhi ruh ïa ka jingdon ryngkat jong ki nongïalam ka SKRS Byrnihat Area ba kynthup naduh u Chairman Bah Kendrowell Lapang, u Secretary Bah Johniyo Syiem nalor kiwei kiwei ki nongkitkam bad Rangbah Shnong ka thaiñ.
Ki nongïalam ka Synjuk kiba la ai jingkren ha kane ka sngi, ki la pynpaw ïa ka jingsngew sarong bad ka jingkmen shikatdei eh halor ka jingibit jong ka Sorkar Jylla hapoh ka jingïalam u Conrad K Sangma, Myntri Rangbah ka Jylla, ban thung ïa u Bah Sosthenes Sohtun uba ki ju khot ieid kum u Bahdeng ban long kum Myntri Sorkar.
Ki nongïalam Synjuk kila pynpaw ruh ba lyngba kane ka kyrdan, u Bah Sosthenes Sohtun un dang lah ban ai shuh-shuh ïa ka jingshakri kaba kham janai na ka bynta ki paidbah ka konstitwensi, ka district bad ka Jylla hi baroh kawei.
Na ka liang u Bah Sosthenes Sohtun pat u la pynpaw ïa ka jingsngewnguh bad ai khublei kyrpang halor ka jingpynlong ka Synjuk ïa kane ka prokram kaba la ithuh ïa ka jingshakri bad ka jingtrei shitom ka jong u na ka bynta ban kyntiew ïa ka bha ka miat bad ka roi ka par jong ki paidbah nongshong shnong.
Ha kawei de ka bynta, u Bah Sosthenes Sohtun u la kyntu ïa ki nongïalam shnong ka thaiñ, kaba dei ruh ka khappud bad ka Jylla Assam ba kin long kiba peitngor bha halor ka jingnang kharoi ki kam sniew, ka jingwan rung kyrthep ki mynder bad ruh khamtam ka jingjia rahbor bad shah pynïap ki khyllung khynnah kumba la mih ha ki lad pathai khubor ha kine ki khyndiat sngi ha ka Jylla.
