Shillong, Risaw 13
Ka Nongrah SC ka la pynliem noh ïa ka Mawkhar SC da 3-1 kol na ka bynta ban khur ïa ka jingjop kaba nyngkong ha ka 1st Division Football League 2025 ba la pynïaid da ka Shillong Sports Association ha ka lah sngi U Blei.
Kane ka nam jop ka la wan urlong lyngba ki ar kol ba la thep shwa ban wai lyngba u Samborlang Wankhar na ka bynta ban pynlong ïa kane ka kynhun ban khur ïa ki lai point kiba nyngkong.
Te kumta ka Nongrah da kane ka jingjop ka la jam shi kyrdan kata sha kaba san bad kamai 4 point na ki lai sien ïakhun, katba ka Mawkhar ka la ïaisah ha ka kyrdan ba hynñiew bad 1 point.
Haba phai sha kane ka jingïakhun, ka Nongrah ka la pynkhihjar nyngkong lyngba u Shanbok Marboh ha ka minit kaba 27, hynrei hadien shiteng kynta ka Mawkhar ka la pynïakhaid kylla lyngba u Shaipharlin Nongsiej (35) na ka bynta ban ïakhaid mar shi kol ha ka kylla step.
Wat hapdeng ka jingïakhun kaba tyngeh baroh ar ki kynhun kim shym la lah ban thep kol biang ha ka kylla miet. Hynrei shwa ban kut artad ka jingïalehkai ka Nongrah ka la ïoh ban thep syndon ar kol lyngba u Samborlang (90+2 & 90+3) na ka bynta ban ïoh ïa ka jingjop.
Ka jingïalehkai ha ka sngi Ba-ar kan long hapdeng ka Nongkrem SC pyrshah ïa ka Nongkseh SC ha ka por 1:30 nohphai sngi.
