Shillong, Risaw 13
Ka jingïakop king lieng ne ka Megha Kayak Fest 2025 (Asian Extreme Kayak Championship) kan long biang ha ka wah Umtrew kaba ha ka shnong Umtham, Ri Bhoi District naduh 14 haduh 18 tarik mynta u bnai.
Kane ka dei ka sien kaba hynñiew ban pynlong ïa kane ka jingïakop ha kaba yn wan shim bynta da ki nongking lieng na Asia bad wat na nabar jong kane ka dewbah.
Ïa kane ka jingïakop la pynlong da ka Ri Bhoi Water Sports & Tourism Corporation Society Limited bad yn kyrshan lang da ka tnat ïalehkai jong ka Sorkar Jylla ryngkat ka Indian Kayaking and Canoeing Association (IKCA) ban kyntiew ïa kane ka jingïalehkai.
Ha kane ka tamasa yn sakhi ïa ki jingïakop kum ka Down River Sprint bad ka Canoe Slalom Cross na ka bynta ki shynrang bad kynthei ha la ki jong ki rta bad ki jingtbit jong ki.
Kat kum ka kyrwoh la ong ba ki khusnam na ka bynta baroh ki nongjop kynthei bad shynrang kin ïai neh kumjuh kumba long ha u snem ba la lah kaba kynthup ïa T. 30,000 ïa kiba wan ba nyngkong ha ka Down River Sprint, Kayak Cross race bad Kayak Cross, bad T. 75,000 na ka bynta ki nongjop (overall winner). Ka khusnam kaba T. 30,000 na ka bynta ki nongjop ha ka Extreme Kayak Sprint bad Enduro.
Kumba ka paw kane jingïakop king lieng ka la long kaba paw naduh ki snem ba la leit ha kaba la sakhi ïa ka jingwan shim bynta da ki nongkinglieng kiba na kylleng ka ri India, kumjuh na Nepal, bad United Kingdom.
